Ermənistan baş naziri Nikol Paşinyan aprelin 24-də 1915-1917-ci illərdə Osmanlı ərazisində ermənilərin qətliamı hadisələrini anıb. 

O, həmin vaxt qətlə yetirilən ermənilərin xatirəsinə həsr olunmuş “Tsitsernakaberd” abidəsini ziyarət edib, eləcə də videomüraciət paylaşıb. 

Baş nazir müraciətində deyib ki, erməni xalqı gələcəkdə "Meds Yeğern” (ermənicədən tərcümədə “Böyük Cinayət” - red.) kimi hadisələrin təkrarlanmaması məqsədinə nail olub. 

"Biz bu məqsədə nail olmuşuq, ona görə ki, biz başa düşmüşük ki, "Meds Yeğern" hadisəsinin beynəlxalq oyunçuların bir-birinə qarşı mübarizəsində alətə çevrilməsinə yol vermək mümkün deyil. Milli Elmlər Akademiyamız tərəfindən nəşr olunmuş “Erməni Tarixi” cildi qəti şəkildə müəyyən edir ki, "Meds Yeğern" digər amillərlə yanaşı, erməni xalqının beynəlxalq intriqalara cəlb olunması praktikasının nəticəsidir. Bu praktika XIX əsrin ortalarında başlamış və 1915-ci ildə öz faciəvi zirvəsinə çatmışdır", - o qeyd edib. 

Paşinyan əlavə edib ki, ermənilər bu gün Ermənistanın kiçik ərazisində sülh və firavanlıq içində yaşaya bilir. 

"Ermənistan Respublikası, hazırkı ərazisi ilə 5-10 milyon erməni üçün yaşayış yeri ola bilər. Sinqapurun ərazisi Sevan gölünün 2/3-dən də azdır, amma orada 5,5 milyon insan yaşayır. Çünki dövlət təhsil, özünüdərk, sülh və insan mərkəzli məqsədlər üzərində qurulub. Bu gün biz Ermənistan Respublikasını məhz bu məntiqlə, “Real Ermənistan” ideologiyası ilə idarə edirik. Başa düşürük ki, sülh və təhlükəsizlik, ilk növbədə, qonşularla tənzimlənmiş münasibətlər deməkdir və bu münasibətlər bir-birinin ərazi bütövlüyünü, suverenliyini, sərhədlərin toxunulmazlığını və siyasi müstəqilliyini tanımaq əsasında qurulmalıdır", - o deyib. 

1915-ci il hadisələri Fransa, Almaniya və İtaliya da daxil olmaqla Avropa İttifaqına üzv dövlətlərin əksəriyyətinin parlamentləri və hökumətləri tərəfindən “soyqırımı” kimi rəsmən tanınıb. Keçmiş ABŞ prezidenti Co Bayden də hadisəni "soyqırımı" adlandırmışdı. 

Paşinyanın əvvəllər də "erməni soyqırımı" barədəki çıxışı Ermənistanda mübahisəli qarşılanıb. 

O, 2025-ci ilin yanvarında demişdi ki, bu hadisə yalnız 1950-ci illərdə, SSRİ rəhbərliyinin əli ilə ictimai məsələyə çevrilib.