Vətəndaş Hüquqları İnstitutunun rəhbəri Bəşir Süleymanlı həbsdə üzləşdiyi çətinliklərlə bağlı yaxınları vasitəsilə açıqlama yayıb. 

O, həm hüquqlarının məhdudlaşdırıldığını, həm də saxlanma şəraitinin qeyri-insani olduğunu bildirib.

Bəşir Süleymanlı iyulun 16-da Bakı Apellyasiya Məhkəməsində həbs müddətinin uzadılması ilə bağlı keçirilən iclasda hakimin davranışlarından narazı qaldığını bildirib. Onun sözlərinə görə, hakim Emin Əliyev proses boyunca aqressiv davranıb:

“Hakim aqressiv davranaraq bir neçə dəfə sözümü kəsdi və çıxışıma imkan vermədi. Bu ifadə azadlığımın və özünü müdafiə etmək hüququmun kobud şəkildə pozulmasıdır.”

Bəşir Süleymanlı bu səbəbdən Məhkəmə Hüquq Şurasına və Ombudsman Aparatına rəsmi şikayət ünvanlayacağını bildirib.

Hüquq müdafiəçisi eyni zamanda məhkəmə zallarında məhkumların saxlanıldığı yerlərdə şəraitin ağır olduğunu da vurğulayıb:

“Məhkəməyə aparılanda saatlarla 40-50 nəfərlə birgə kiçik otaqda saxlanılırıq. Bu insanlar arasında xəstələr də olur. Belə şəraitdə qalmaq sağlamlıq üçün təhlükəlidir.”

Bəşir Süleymanlı, istintaq təcridxanasında ona göndərilən bəzi ərzaq və əşyaların ona çatdırılmasında da problemlər olduğunu qeyd edib. 

“Mənə göndərilən süd məhsullarının qabı açıq şəkildə verilir. Onlar tez xarab olur və istifadəyə yararsız vəziyyətə düşür”, - B. Süleymanlı qeyd edib.

Bundan əlavə, Süleymanlı ona göndərilən kofe və kitabların verilmədiyini də deyir, baxmayaraq ki, bu məhsulların verilməsinə qanunla qadağa yoxdur.

Bu il martın 14-də “Vətəndaş Hüquqları” İnstitutunun rəhbəri Bəşir Süleymanlı və “Seçki Müşahidə Alyansı”nın rəhbəri Məmməd Alpay Məmmədzadə QHT-lərlə bağlı cinayət işi üzrə həbs olunublar.

ABŞ-nin German Marşal Fondunun (GMF) Azərbaycan üzrə məsləhətçisi Mehriban Rəhimli cinayət məsuliyyətinə cəlb olunub, istintaq müddəti ərzində polis nəzarətinə verilib.

Eyni cinayət işi üzrə “Hüquq və İnkişaf” İctimai Birliyinin rəhbəri Hafiz Həsənov təqsirləndirilən şəxs kimi tanınıb və onun barəsində ev dustaqlığı qətimkan tədbiri seçilib.

Sosial Hüquqlar Mərkəzinin rəhbəri Sübhan Həsənli isə ölkədə olmadığından onun haqqında qiyabi həbs qərarı çıxarılıb və axtarışa verilib.