Bu ilin yanvarında İmişlidə kütləvi etirazla nəticələnən, yol polisi avtomobilinin üç məktəblinin ölümünə səbəb olduğu qəza ilə bağlı 17 yaşlı Bəylər Bayramlıya hökm oxunub. 

"Azadlıq Radiosu"nun xəbərinə görə, Lənkəran Ağır Cinayətlər Məhkəməsində keçirilən prosesdə yeniyetməyə 7 il 6 ay həbs cəzası verilib. 

İstintaqın nəticələrinə görə, B.Bayramlı 2025-ci il yanvarın 18-də dayısına məxsus "Mercedes Benz 190" markalı avtomobili sürücülük vəsiqəsi olmadan İmişli şəhərində idarə edib. Bu zaman onun "Əlillərin binası" adlanan ərazidə sola dönərkən qarşı tərəfdən gələn, yol polisinə məxsus "BMW" avtomobilinə yol vermədiyi iddia olunur. 

"O, öz əməlinin ictimai təhlükəli nəticələr verə biləcəyi imkanını qabaqcadan görüb. Lakin kifayət qədər əsas olmadan onların qarşısını alacağını güman edərək, cinayətkarcasına özünə güvənərək hərəkətini davam etdirib", - ittiham aktında yazılıb. 

B.Bayramlı isə ifadəsində deyib ki, sola dönmə edərkən yol polisi çox uzaqda olub və buna görə rahat dönə biləcəyini düşünüb. O əlavə edib ki, yol polisi yalnız ona çatmağa az qalmış səs siqnalını işə salıb və əyləcdən istifadə etməyib.

B.Bayramlı qanunsuz avtomobil idarə etdiyinə görə peşman olduğunu desə də, hadisə yerindən qaçması barədə ittihamı qəbul etməyib. 

Cinayət işində qeyd olunur ki, hadisə anında yol polisi avtomobilinin sürəti saatda 159 km olub. "Mercedes"lə toqquşmadan yayınmaq istəyən yol polisi yoldan çıxıb və səkidə hərəkət edən iki məktəbli – 6-cı sinif şagirdi Zümrüd Mirəliyeva və 4-cü sinif şagirdi Ayan Məmmədovanın hadisə yerində ölümünə səbəb olub. Ayanın sinif yoldaşı olan Məhbubə Əlizadə Bakıya çatdırılsa da, onun da həyatını xilas etmək mümkün olmayıb.

B.Bayramlının sözlərinə görə, o, hadisədən sonra avtomobildən düşüb və yol polisinin sükan arxasında huşsuz vəziyyətdə, məktəblilərin isə yerdə qaldığını görüb qorxub. Yeniyetmə dayısına zəng edib və dayısı ona polis idarəsinə gedib təslim olmağı tapşırıb. 

Ölən uşaqların ailə üzvləri isə B.Bayramlıdan şikayətçi olmayıb. Onlar məhkəmədə iştirak edərkən ifadələrində belə deyiblər. 

Hadisədə iştirak edən polis əməkdaşı da məhkəmədə şahid kimi dindirilib. O iddia edib ki, həmin vaxt saatda 60-70 km sürətlə hərəkət edib, həm sayrışan işıqları, həm də səs siqnallarını işə salıb. 

Bu ilin yanvarında İmişlidə baş verən həmin qəzadan sonra hadisə yerində etirazlar olub, polisin avtomobili aşırılıb, "istefa" şüarları səsləndirilib. 

Bu ilin iyulunda etirazlara görə saxlanılan 19 şəxsə xuliqanlıq ittihamı ilə müxtəlif cəzalar kəsilib. Təqsirli bilinənlərdən səkkiz nəfərə 1 ildən 4 ilə qədər həbs cəzası, digərlərinə isə şərti cəzalar verilib.