Azərbaycan prezidenti İlham Əliyev ötən ilin dekabrında AZAL təyyarəsinin Rusiya tərəfindən vurulduğunu və Azərbaycanın beynəlxalq ədliyyə sisteminə müraciət edəcəyini deyib. 

O, bunu iyulun 19-da Xankəndidə III Şuşa Qlobal Media Forumunda Rusiya-Azərbaycan münasibətləri ilə bağlı sualı cavablandırarkən deyib. 

Əliyev bildirib ki, hadisədən yeddi ay keçməsinə baxmayaraq, Azərbaycan Rusiyadan heç bir cavab almayıb. 

O, həmin vaxt AzTV-yə müsahibəsində Rusiyanın hadisəyə görə üzr istəməsini, məsul şəxsləri cəzalandırmasını və qurbanların ailələrinə təzminat ödəməsini tələb etmişdi. 

"Bizim üçün hər şey aydındır, biz bilirik nə baş verib. Biz bunu sübut edirik və bilirik ki, Rusiya rəsmiləri də bundan xəbərdardır. Onlar da gözəl bilirlər nə baş verib. Ona görə də istənilən qonşu bunu etməli idi. Bizim tələbimiz təbii tələb idi", - Əliyev qeyd edib. 

Dövlət başçısı, həmçinin, Baş prokuror Kamran Əliyevin Rusiya İstintaq Komitəsinə "mütəmadi olaraq" məktub ünvanladığını, lakin bir qayda olaraq "hələ də araşdırma aparıldığı" cavabını aldıqlarını deyib. 

"Biz gözləyirik ki, görək bu təhqiqat nə zaman bitir. Ancaq mən hesab edirəm ki, bu, məsuliyyətsiz davranmaqdır. Bu o demək deyil ki, biz bunu unudacağıq. Xeyr, biz bunu unuda bilmərik. Biz artıq Rusiya tərəfini məlumatlandırmışıq ki, beynəlxalq ədliyyə sisteminə müraciət edəcəyik. Biz müəyyən bir qovluq hazırlayırıq. Bilirik ki, buna vaxt lazımdır. On il lazım oldu ki, Malayziya hava yollarına məxsus “Boeing”lə bağlı təhqiqat başa çatsın. Ancaq biz bu ədalətə nail olacağıq", - o əlavə edib. 

Əliyev mövzu ilə bağlı danışarkən ötən ayın sonunda Yekaterinburq şəhərində azərbaycanlıların ölümü və həbsləri ilə başlayan son gərginliyə isə münasibət bildirməyib. 

Azərbaycan və Rusiya arasında gərginlik ötən ilin dekabrın 25-də AZAL təyyarəsinin Aktauda qəzaya uğramasından sonra başlayıb.

Rəsmi Bakı təyyarənin həmin gün Ukrayna dronlarından qorunan Rusiya hərbi hava qüvvələri tərəfindən vurulduğunu iddia edib. 

Azərbaycanın hökumətyönlü media orqanları isə yazıb ki, təyyarənin vurulduqdan sonra Rusiya ərazisində qəza enişi etməsinə icazə verilməyib ki, təyyarə Xəzər dənizinə düşsün və izlər itirilsin. 

Bir neçə gün sonra Rusiya prezidenti Vladimir Putin hadisənin Rusiya ərazisində baş verməsinə görə üzrxahlıq edib, lakin üzərinə məsuliyyət götürməyib. 

Qəza nəticəsində təyyarənin göyərtəsində olan 67 nəfərdən 38-i həlak olub.