İyunun 23-də Fransanın Strasburq şəhərində Avropa Şurası Parlament Assambleyasının (AŞPA) yay sessiyası start götürüb. 

2024-cü ildə quruma göndərdiyi nümayəndə heyətinin mandatı təsdiq olunmadıqdan sonra Azərbaycan bu sessiyaya da yeni heyət göndərməyib. 

Bunu sessiyada iştirak edən hüquqşünas, III Respublika Platformasının qurucu üzvü Səməd Rəhimli Toplum TV-yə deyib. 

“Bildiyimiz kimi, Azərbaycanla AŞPA arasında münasibətlər artıq bir il yarımdır ki, tamamilə donub. Buna görə də, tərəflər arasında heç bir əməkdaşlıq mövcud deyil və Azərbaycandan AŞPA-ya qarşı tənqidlər səsləndirilir. Buna baxmayaraq, AŞPA-da Azərbaycanda insan hüquqlarının vəziyyəti aktual olaraq qalır və burada bir sıra qruplar bu məsələnin qaldırılmasının vacibliyinə inanırlar. AŞPA-da Azərbaycan nümayəndə heyətinin mandatı artıq bir il yarımdan çoxdur dondurulub və Azərbaycan yeni nümayəndə heyəti göndərməyib. Bununla yanaşı, AŞPA-da birgə araşdırma mexanizmi var və qurum bu mexanizmi işə salaraq Azərbaycanda insan hüquqları məsələsini sistematik, institusional olaraq gündəmə gətirə bilər. Bununla da, AŞPA bu məsələni Avropa Şurası baş katibi və Nazirlər Komitəsi önündə qaldıra bilər”, - o bildirib. 

Rəhimli qeyd edib ki, Avropa Şurasının digər qurumlarının - Baş Katiblik və Nazirlər Komitəsinin Azərbaycanla münasibətləri davam edir. Onlar Azərbaycanla bağlı fəaliyyət planını təsdiq ediblər və növbəti mərhələdə bu planın icra edilməsi gözlənilir. 

“Azərbaycanda insan hüquqları isə əsasən AŞPA-nın səlahiyyətində olan məsələ idi, AŞPA da bunu araşdırma mexanizmini işə salaraq gündəminə gətirə bilər. Bununla bağlı qeyri-rəsmi müzakirələr davam edir və mexanizmin işə salınması mövzusu növbəti sessiyalarda qaldırıla bilər. Ümid edirik ki, qurum bu mexanizmi işə salacaq və Azərbaycanda insan hüquqlarının vəziyyətini araşdıracaq. Bu gerçəkləşsə, Baş Katiblik və Nazirlər Komitəsi Azərbaycandan insan hüquqları və siyasi məhbuslar problemi barədə tədbirlər görməyi tələb etməli olacaq. Nazirlər Komitəsi, həmçinin, “Məmmədli qrup işi” çərçivəsində də siyasi məhbus problemini gündəmə gətirib. Hələ ki Azərbaycan bu məsələ ilə bağlı fəaliyyət planını təqdim etməyib. Çox güman ki onlar sentyabr ayında bunu təqdim etməli olacaqlar”, - o əlavə edib. 

Yaz sessiyası iyunun 27-ə qədər davam edəcək. 

AŞPA ötən il yanvarın 24-də Azərbaycanın Avropa Şurasına üzvlükdən irəli gələn əsas öhdəliklərini yerinə yetirməməsini əsas gətirərək azərbaycanlı deputatların etimadnamələrini təsdiqləməyib.

Digər əsaslara nümunə olaraq Azərbaycanda insan hüquqlarının pisləşən vəziyyəti, jurnalistlərin həbsi, növbədənkənar prezident seçkisini müşahidə etmək üçün quruma dəvət göndərilməməsi, habelə Qarabağda hərbi əməliyyatlar göstərilib.