“Demokratik Təşəbbüslər İnstitutu”nun rəhbəri Akif Qurbanov məhkəmədən onun həbsdə saxlanılması müqabilində digər “Toplum TV” əməkdaşlarının azadlığa buraxılmasını xahiş edib.

O bu barədə “Toplum TV işi” üzrə keçirilən məhkəmənin ilk hazırlıq iclasında deyib.

“İş materiallarına baxanda aydın olur ki, bunlar bizi bir mütəşəkkil dəstə kimi, məni də bu dəstənin başçısı kimi görürlər. Əgər elədirsə, mənim həbs qətimkan tədbirimi dəyişməyin, amma digərlərini buraxın,” Akif Qurbanov deib.

Bu zaman “Demokratik Təşəbbüslər İnstitutunun” əməkdaşı Əli Zeynal deyib ki, Akif Qurbanov həbsdə saxlanılacaqsa, o da qalacaq. 

Akif Qurbanov çıxışında, həmçinin iş üzrə həbs olunan şəxslərin ayrı-ayrı saxlanılmasına da toxunub. 

“İstintaq dövründə siyasi motivlərlə həbs olunan şəxslərin ayrı saxlanılmasını başa düşmək olardı. Amma artıq istintaq bitib. Ayrı saxlanılmanın bir əsası varmı?”, deyə o, hakimə sual verib. 

Hakim isə məhkəmənin saxlanılan şəxslərin saxlanma vəziyyətləri ilə bağlı təcridxana rəhbərliyinin işinə qarışma səlahiyyəti olmadığını bildirib. 

“Toplum TV”nin həmtəsisçisi Ələsgər Məmmədli  məhkəməyə müraciət edərək onkoloji şişi olduğuna görə ev dustaqlığına buraxılmasını istəyib. 

“Bu mənim yaşam hüququmla bağlıdır. İş demək olar ki, yekunlaşıb, önümüzə cəfəngiyyatla dolu qalaq-qalaq kağız qoyublar. Mənim bundan sonra azadlıqda ola-ola məhkəmənin aparılmasına nə maneə ola bilər?”, deyə o sual edib. 

Media eksperti onun və digərlərinin azadlığa buraxılmasının təkcə hüquq yox, həm də insaniyyət məsələsi olduğunu bildirib. 

“Bakı İstintaq Təcridxanasında 13 aydır 4 nəfərlik otaqlarda 8 nəfər olmaqla saxlanılırıq, növbə ilə yatırıq. Mən saxlanıldığım müddətdə 370 kitab oxumuşam, cəmiyyətə heç bir təhlükə törətmirəm”, o deyib. 

Məmmədlinin vəkili Fəxrəddin Mehdiyev, həmçinin məhkəmə prosesinin ictimaiyyətin diqqətində olması səbəbilə prosesin daha geniş zalda keçirilməsi ilə bağlı vəsatət verib. 

O, habelə, məhkəmədən təqsirləndirilən şəxslərin şüşə qəfəsdən çıxarılması və vəkilləri ilə yanaşı oturmasını istəyib. 

Ruslan İzzətlinin vəkili Bəhruz Bayramov da müdafiə etdiyi şəxsin səhhətindəki problemləri əsas gətirərək həbsin ev dustaqlığı ilə əvəz olunmasını istəyib.

“Ruslan İzzətli böyrəyində ciddi xəstəlik ola-ola Qarabağda 1 il 6 ay döyüşüb, indi istintaqdan qaçacaq?”, o sual edib. 

Lakin Ağır Cinayətlər Məhkəməsində hakim Azər Tağıyevin sədrliyi ilə keçirilən prosesdə həbs edilənlərin ev dustaqlığına buraxılması ilə bağlı vəsatət təmin edilməyib. 

Ələsgər Məmmədlinin səhhəti ilə əlaqədar verilən vəsatətə isə baxılacağı deyilib. 

Məhkəmənin hazırlıq iclası aprelin 24-dək təxirə salınıb.