“Abzas Media işinə” görə həbs edilən Məhəmməd Kekalov ibtidai istintaq dövründə verdiyi ifadələri təkzib edib və ifadənin təzyiq altında alındığını bildirib.

“Abzas Media”nın direktor müavini bu barədə aprelin 1-də baş tutan məhkəmə prosesində danışıb və ifadəni məcburiyyətdən verdiyini açıqlayıb.

“Dəfələrlə deyirdim ki, mənim heç nədən məlumatım yoxdur. Amma müstəntiqlər məni məcbur edirdilər ki, ad çəkim, nəsə danışım. Mən də məcburiyyətdən “Mirşahinin vaxtı” verilişində eşitdiyim beynəlxalq təşkilatların adlarını əzbərlədim və istintaqda özümdən uydurdum ki, guya bu təşkilatlardan pul almışıq”, o deyib. 

Kekalov istintaqda dediklərinin heç birinin doğru olmadığını da vurğulayıb.  

“Heç vaxt heç bir yerdən pul gətirməmişəm, pul gətirəni də görməmişəm. Sadəcə müstəntiqlər məndən əl çəksinlər deyə, uydurma şəkildə ifadə verməyə məcbur qaldım,” o qeyd edib. 

Kekalov məhkəmədə ifadəsində “Abzas Media”nın direktoru Ülvi Həsənli üçün tərcüməçi kimi çalışdığını, media orqanının maliyyəsi ilə bağlı heç bir məlumatının olmadığını deyib. 

Aprelin 1-də keçirilən məhkəmə prosesində, həmçinin “Abzas Media işinə” görə həbs edilmiş jurnalistlər Nərgiz Absalamova və Hafiz Babalı da sərbəst ifadə veriblər.

Absalamova da çıxışında qaçaqmalçılıq ittihamını rədd edib və bildirib ki, o və həmkarları Prezident İlham Əliyevin sifarişi ilə həbs olunublar:

“Əliyevin siyasətini tərifləməyə razılaşsaydıq, indi burda olmazdıq. Bizdən bunu istəyirdilər. Bizsə araşdırdıqca onun dəhşətli korrupsiya əməllərini görürdük.”

Absalamova dövlət ittihamçısının suallarına cavab verməkdən imtina edib və bunu prosesin “hüquqi yox, siyasi” olduğu ilə əsaslandırıb. 

Hafiz Babalı da ittihamları rədd edib. O deyib ki, saxlandığı Bakı İstintaq Təcridxanasında qeydiyyat kitabçasında adının önünə “müxalifyönlü”, “şər-böhtana meyilli” kimi sözlər yazılıb və bu onun siyasi motivlə həbs olunduğunu sübut edir. 

“Vicdanı olan hər kəs bilir ki, bizim günahımız Azərbaycandakı həqiqətləri cəmiyyətə obyektiv, bəzək-düzəksiz çatdırmağımızdır. 1937-ci il repressiyalarını törədən canilər kimi, bizlərə qarşı terrorda əməyi keçən müstəntiqlər, prokurorlar, sifarişçilər də tarix və ədalət məhkəməsi önündə cavab verəcək”, Babalı deyib. 

İş üzrə növbəti məhkəmə iclası aprelin 8-ə təyin olunub. 

“AbzasMedia” işi üzrə həbslər 2023-cü il noyabrın 20-dən başlayıb. Əvvəl nəşrin təsisçisi və direktoru Ülvi Həsənli və koordinatoru Məhəmməd Kekalov, daha sonra baş redaktoru Sevinc Vaqifqızı həbs edilib.

Daha sonra həbslər araşdırmaçı jurnalist Hafiz Babalı, Nərgiz Absalamova, Elnarə Qasımova, Fərid Mehralızadə ilə davam edib. 

İlkin olaraq onlar qaçaqmalçılıqda ittiham ediliblər, daha sonra isə ittiham ağırlaşdırılıb. 

Jurnalistlərə qanunsuz sahibkarlıq, cinayət yolu ilə əldə olunan vəsaitlərin leqallaşdırılması, vergidən yayınma və s. ilə bağlı əlavə ittihamlar verilib. 

Qanunvericiliyə görə, bu maddələrə görə 12 ilə qədər azadlıqdan məhrumetmə cəzası nəzərdə tutulur.