Aprelin 6-da Nərimanov rayon Məhkəməsində Müsavat Partiyasının və Milli Şuranın üzvü olan Tofiq Yaqublunun həbsdə saxlama müddətinin uzadılmasına dair prokurorun təqdimatına baxılıb və təmin edilib. Həbs müddəti daha iki ay müddətinə uzadılıb. 

Tofiq Yaqublu ötən ilin dekabrında həbs olunub. Onun barəsində Cinayət Məcəlləsinin 178.3.2 (dələduzluq-külli miqdarda ziyan vurmaqla törədildikdə) və 320.1-ci (rəsmi sənədləri, dövlət təltiflərini, möhürləri, ştampları, blankları saxtalaşdırma, qanunsuz hazırlama və ya satma) maddələri ilə ittiham edilir. Həmin vaxt məhkəmə Tofiq Yaqublu barəsində dörd aylıq həbs-qətimkan tədbiri seçmişdi. Həbs müddəti başa çatdığına görə prokuror müddətin daha iki ay müddətinə uzadılması üçün məhkəməyə təqdimat göndərib və qeyd olunduğu ki, müddət daha iki ay müddətinə uzadılıb. 
                                
Siyasətçi həbs olunarkən qızı Nigar Həzinin sosial şəbəkədə yazdığına görə, evlərindən xarici və milli valyutada pul tapılıb. Nigar Həzi bu pulun onlara aid olmadığını və evlərinə yerləşdirildiyini vurğulayıb. O həmçinin qeyd edib ki, evdən anasına aid olan mobil telefonlar və kompüter də götürülüb. 

Bir neçə gün əvvəlsə Nərimanov rayon Məhkəməsi aprelin 2-də müxalif siyasətçinin ev dustaqlığına buraxılması ilə bağlı verilən vəsatəti rədd etmişdi. 

Tofiq Yaqublunun vəkillərinin bildirməsinə görə, o, öz həbsini siyasi fəaliyyəti ilə bağlayıb. Amma rəsmilər ölkədə siyasi sifarişli həbslərin olması ilə bağlı deyilənləri qəbul etmirlər. 

Tofiq Yaqublu əvvəllər də bir neçə dəfə həbsdə olub. O, iğtişaş salmaq, başqasına xəsarət yetirmək və başqa qanunsuz əməllərdə ittiham edilib. Amma bütün ittihamları qurama sayıb.

Bir sıra yerli hüquq-müdafiə təşkilatları onun adını siyasi məhbus siyahılarına daxil edib. Azərbaycan rəsmiləri isə ölkədə siyasi məhbusların olması fikrini qəbul etmirlər. Onlar deyirlər ki, siyasi məhbus siyahılarında yer alan şəxslər sırf törətdikləri əmələ görə mühakimə ediliblər.

Tofiq Yaqublunun hazırda ittiham edildiyi maddələrdə 7 ildən 12 ilədək azadlıqdan məhrumetmə cəzası nəzərdə tutulur.