Aprelin 3-də 2015-2020-ci illərdə Bakı Şəhər Halqası Əməliyyat şirkətinin İdman Əməliyyatları şöbəsinin rəisi işləmiş Çingiz Mehdiyevin məhkəməsi başlayıb. Bu iş üzrə proses Bakı Ağır Cinayətlər Məhkəməsində keçirilir. Məhkəmə iclasına hakim Leyla Əsgərova-Məmmədova sədrlik edir. 

Çingiz Mehdiyev külli miqdarda dövlət vəsaitini mənimsəməkdə, mənimsədiyi pulları qanunsuz leqallaşdırmaqda ittiham edilir.  

Bu iş üzrə ibtidai istintaq Baş Prokuror yanında Korrupsiyaya qarşı Mübarizə Baş İdarəsi tərəfindən aparılıb. İttiham aktında qeyd olunanlara görə, Çingiz Mehdiyev 2006-cı ildə Amerikaya köçüb, oranın vətəndaşlığını qəbul edib. Pasport məlumatlarında ad-soyadını dəyişib, Gino Metie olub. Elə Amerikada Nərminə Ələkbərovayla ailə qurub, bir övladları olub. 5 il əvvəl faktiki ayrılıblar, 2023-cü ildə məhkəməyə boşanmaq üçün ərizə veriblər. 

Azərbaycana qayıtdıqdan sonra Gino Metie əvvəlki ad-soyadına da qayıdıb. 

İttiham aktında qeyd olunur ki, Çingiz Mehtiyevi ifşa edən elə keçmiş həyat yoldaşı olub. O, istintaqa verdiyi ifadəsində bildirib ki, Çingiz Mehdiyev “Formula 1” yarışları zamanı mənimsədiyi pullarla qardaşına Amerikada mülk alıb, anasının adına Seyşel adalarında şirkət açıb, həmin şirkətə pullar köçürüb.
 
İstintaq belə qənaətə gəlib ki, Çingiz Mehdiyev Formula 1 yarışları ərəfəsində marşallar üçün geyim, ləvazimat, yağçəkən parçalar və digər əşyaları sifariş verərkən malların qiymətini süni şəkildə artırıb. Həmçinin dövlət büdcəsindən ayrılmış pulları öz yaxın adamlarının adına olan şirkətlərə köçürüb. Qiymət şişirtməsi nəticəsində əldə edilmiş pullar isə qəsdən mənimsənilib. 
Başqa epizoda görə, Çingiz Mehdiyev ona etibar edilmiş külli miqdarda vəsaiti talamaq niyyəti ilə ofşor zonada - Seyşel adalarında cinayətdən xəbərsiz anasının adına yaratdığı şirkəti Formula 1 yarışlarının keçirilməsi üçün ixtisaslaşmış təşkilat kimi təqdim edərək müqavilə bağlatdırıb.

İstintaq orqanı Çingiz Mehdiyevin ümumilikdə 397 min 852  manat dövlət vəsaitini mənimsədiyini iddia edir. Bundan əlavə o, əldə etdiyi pulların həqiqi mənbəyini gizlətmək məqsədilə külli miqdarda pul vəsaitlərini xarici banklara köçürərək leqallaşdırmaqda təqsirləndirilir. İstintaq dövründə Ç.Mehdiyev mənimsədiyi məbləğin 100 min manatını dövlət büdcəsinə geri ödədiyi də qeyd olunur. 

İstintaq vaxtı Çingiz Mehdiyevin Bakıdakı əmlakları (üzərinə həbs qoyulub. Həmin əmlakların ümumi dəyərinin 1 milyon manat civarında olduğu bildirilir. 

Çingiz Mehdiyevi Bakı Şəhər Halqası Əməliyyat şirkətinə həmin vaxtlar şirkətin icraçı direktoru olmuş Arif Rəhimov götürüb. (Keçmiş idman naziri Azad Rəhimovun oğlu). İstintaq onu da dindirib. Arif Rəhimov Çingiz Mehdiyevin əməllərindən xəbərsiz olduğunu bildirib. 

Çingiz Mehdiyevə qarşı istintaq Cinayət Məcəlləsinin 179.3.2 (külli miqdarda mənimsəmə), 12.1, 193-1.3.2 (cinayət yolu ilə əldə edilmiş pul vəsaitlərini leqallaşdırma) 308.2 (vəzifə səlahiyyətlərindən sui-istifadə) və 313-cü ( vəzifə saxtakarlığı) maddələri üzrə aparılıb. 

Çingiz Mehdiyev ev dustaqlığındadır. Hazırlıq iclasında hakim onunla bağlı anket məlumatları dəqiqləşdirib. Məhkəmə baxışı aprelin 15-nə təyin edilib.