“İllərlə aidiyyəti qurumlara yazsaq da, nəticəsiz qalmışdı. Məcbur olduq ki, özümüz pul toplayıb məhəllənin yolunu səliqəyə salaq. Ancaq bir neçə gün əvvəl bələdiyyə gəlib yolu qazdı, yenə məhəlləni bərbad vəziyyətə saldı. İndi deyirik, qazmısız, gəlin düzəldin, deyirlər ki, bizlik deyil”.  

Sumqayıt şəhərinin Yaşıldərə adlanan ərazisinin sakinləri iddia edir ki, bir müddət əvvəl toplaşaraq öz vəsaitləri hesabına məhəllənin yollarını səliqəyə salmağa çalışıblar. Buna görə 40 ailə 20 manatdan toplayaraq yollara çınqıl alıb töküb. 

Ötən ayın sonunda sakinlər çınqıllı məhəllədə qazıntı aparıldığını görüblər: “Qazıntıya bələdiyyənin Zaur adlı əməkdaşı rəhbərlik edirdi. Kanallar qazırdılar. Biz həmin vaxt həmin əməkdaşa bildirdik ki, bu çınqılı biz kasıb insanlar balalarımızın yeməyindən, geyimindən kəsib pul toplayıb, əziyyətlə alıb tökmüşük yola. Heç olmasa qazıntı aparandan sonra səliqəyə salacaqsızmı yolu? Dedi ki, əlbəttə, narahat olmayın, işlər yekunlaşandan sonra yol səliqəyə salınacaq, dövlət diqqət göstərir”.  

Amma sakinlərin sözlərinə görə, işlər başa çatsa da, yollar bərbad vəziyyətdə qalıb. Yağış yağanda məhəlləni su basır: 

“İndi vəziyyət əvvəlkindən də pisdir. Yağış yağanda uşaqlar məktəbə gedə bilmir. Əlacsız qalmışıq. Dəfələrlə müraciət etmişik, deyir ki, bu məsələ bizlik deyil. Hara müraciət edək, kimə deyək, bilmirik”. 

Sumqayıt Şəhər İcra Hakimiyyətindən bildirilib ki, bu deyilənlərin onlara aidiyyəti yoxdur, məhəllədaxili yollar ərazi üzrə bələdiyyənin fonduna toplanmış vəsait hesabına təmir olunur. 

Toplum TV Sumqayıt Şəhər Bələdiyyəsindən Zaur Məmmədovla əlaqə saxlayıb. O, bildirib ki, Yaşıldərə adlanan ərazidəki qazıntıların bələdiyyə ilə heç bir əlaqəsi yoxdur: “Orda bir oğlandır, məhəlləni çəkib “Tik-tok”a da qoyur, mənim adımı çəkir ki, guya o işlər mənlikdir. Bələdiyyəyə heç bir aidiyyəti yoxdur. Orda sakinlər özləri “Azərsu” ASC-yə müraciət ediblər, sənəd toplayıblar, kanalizasiya xətti çəkilir. Bu işləri niyə bələdiyyəyə bağlayırlar, bilmirəm”, - Zaur Məmmədov deyib.

Beləliklə, nə Sumqayıt Şəhər İcra Hakimiyyəti, nə də Sumqayıt Şəhər Bələdiyyəsi yolu təmir etmək istəyir, sakinlərsə ikinci dəfə öz hesablarına yol çəkməyə gücləri çatmadığını deyirlər.