Paytaxtın Yasamal rayonunda yerləşən və Bayırşəhər kimi tanınan ərazidəki binaların tarixi abidələrin dövlət reyestrində saxlanılıb-saxlanılmayacağı ilə bağlı müzakirələr davam edir.

Belə ki, sakinlərin şikayətinə cavab olaraq Yasamal Rayon İcra Hakimiyyəti başçısının müavini Hüseyn Əfəndiyevin adından yazılan məktublarda qeyd  olunur ki, ərazidəki "istismar müddətini başa vurmuş və bərpa olunması mümkün olmayan bəzi binaların yerli əhəmiyyətli memarlıq abidələrinin siyahısından çıxarılması üçün müvafiq tədbirlər görülür". 

Məktubların bir neçəsi memar və ictimai fəal Abdul Hüseynov tərəfindən öz sosial media hesabında ictimailəşdirilib.

Məktublar sakinlərin Azərbaycan prezidentinə, Nazirlər Kabinetinə, Milli Məclisə və Bakı Şəhər Prokurorluğuna yazdıqları ərizələrə cavab olaraq, müxtəlif vaxtlarda göndərilib. Sakinlər ərizələrində Bayırşəhərdə bir ildən çoxdur söküntü işlərinin getməsindən şikayətləniblər. 

Abdul Hüseynov "Toplum TV"-yə bildirib ki, Azərbaycan qanunvericiliyinə görə, binaların tarixi abidələrin reyestrindən çıxarılmasından icra hakimiyyətləri yox, Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti məsuldur. 

Məqalə yayımlanana qədər Yasamal Rayon İcra Hakimiyyəti və Mədəni İrsin Qorunması, İnkişafı və Bərpası üzrə Dövlət Xidmətindən açıqlama almaq mümkün olmayıb. 

"İcra başçısının müavini yəqin ki, üzərində səlahiyyət hiss edərək bu məktubu yazır. Bu savadsızlıqdır, yoxsa sadəcə Mədəniyyət Nazirliyinə göz yummaqdır? Belə çıxır ki, ölkədəki dövlət qurumları bir-birinə tabe olmur. Burada qərarverici orqan Mədəniyyət Nazirliyi və onun tabeliyindəki Mədəni İrsin Qorunması Xidmətidir. Onların Milli Elmlər Akademiyasına göndərdiyi rəy əsasında qərar verilir ki, abidələr reyestrdən çıxarılacaq, söküləcək və s.", - A.Hüseynov qeyd edib.

Mədəni İrsin Qorunması, İnkişafı və Bərpası üzrə Dövlət Xidməti əvvəllər mətbuata və sakinlərə açıqlamalarında bildirib ki, ərazidə tarixi abidələrin reyestrində yer alan binalar sökülməyəcək. 

Bir ildən çoxdur ki, Bayırşəhərdə tarixi binaların və məhəllələrin söküntüsü gedir və yaşı 100-dən çox olan bir neçə bina sökülüb. 

Yasamal Rayon İcra Hakimiyyəti söküntünün ərazidəki Qış Parkının genişləndirilməsi üçün aparıldığını deyir. 

Bakının 2040-cı ilə qədər nəzərdə tutulmuş baş planına əsasən, Bayırşəhərdə Təzəpir məscidi ətrafındakı ərazi "xüsusi mühafizə olunan ərazi" statusuna malikdir. 

Bu statusa əsasən isə, ərazidə söküntü deyil, yalnız yenidənqurma və reabilitasiya işləri aparıla bilər. Sakinlər isə yalnız zəruri olduqda müvəqqəti şəkildə yaxınlıqdakı ərazilərə köçürülə bilərlər. 

A.Hüseynov isə daha öncə "Toplum TV"-yə deyib ki, ərazidə 120-130 yaşlı tarixi abidələr var ki, 2015-16-cı illərdə reyestrdən çıxarılıb.