Həbsdə olan “Arqument.az” saytının baş redaktoru Şəmşad Ağa saxlanılarkən polis tərəfindən zorakılığa uğradığını və hüquqlarının təmin edilmədiyini deyib. 

O, bu barədə ictimaiyyətə məktub ünvanlayıb.

Şəmşad Ağanın yazdığına görə, o, “Neftçilər” metrosu tərəfdə bankomatdan pul çıxararkən maskalı şəxs tərəfindən hücuma məruz qalıb. Əvvəl bunun soyğun olduğunu düşünsə də, sonradan qoluna qandal vurulub və əlavə 3 nəfərlə birlikdə maşına oturdulub. 

Şəmşad Ağanı saxlayan şəxslər “Banditizm”dən (Daxili İşlər Nazirliyi yanında Baş Mütəşəkkil Cinayətkarlıqla Mübarizə İdarəsi - red.) olduqlarını deyiblər. Onlar jurnalistdən telefonunun şifrəsini istəyiblər. Məktubda deyilir ki, Ş.Ağa bundan imtina etdikdə isə fiziki zorakılığa məruz qalıb. 

Jurnalist bildirir ki, təzyiq dərmanını istədikdə ona yalnız telefonunun şifrəsini verəcəyi halda dərmanını verəcəklərini deyiblər. O, vəkillə təmin olunmaq istəyəndə də zorakılığa məruz qalıb. 

“Məni “Neftçilər”də, beşmərtəbələrin arasındakı küçələrdə gəzdirdilər. Tez-tez telefonla danışıb kimdənsə cavab gözləyir, israrla parolu istəyirdilər”, o qeyd edib. 

Jurnalist bildirir ki, sonda maşın onu yaşadığı binanın həyətinə gətirib və Bakı Şəhər Baş Polis İdarəsinin müstəntiqi Samir İsmayılov artıq ərazidə olub. O, jurnalistə “Meydan TV” işi ilə bağlı şübhəli şəxs kimi saxlanıldığını deyib. 

“Meydan TV” tərəfindən paylaşılan məktubun ikinci hissəsində Ş.Ağa evində axtarış aparılmasını təsvir edib. 

O qeyd edib ki, axtarış zamanı qardaşı və qızı evdə olub. 

“Qapı açılan kimi quzğun kimi içəri doluşdular və ilk modemi kəsib götürdülər. Sonra yataq otağımıza girib, şkafları axtarmağa başladılar, bütün kağız-kuğuzu, pal-paltarı açıb-tökdülər. Mənə, yoldaşıma aid kompüterləri, elektron cihazları, telefonları, planşetimi, qardaşımın telefonunu götürdülər. 7-8 polis, müstəntiq və iki hal şahidi ayaqqabı ilə evimin içində var-gəl edirdilər. Hər yerə baxırdılar, çantaları, çamadanları açıb, içini tökürdülər”, - Ş.Ağa yazıb. 

Jurnalist qeyd edir ki, evdə müstəntiq də ondan telefonunun şifrəsini tələb edib və yalnız şifrəni verdikdən sonra vəkili ilə əlaqə saxlanılacağını bildirib. Ş.Ağa isə yenə imtina edib. Bu zaman əməliyyatçılardan biri jurnalisti qardaşı və qızının da polis idarəsinə aparılacağı ilə təhdid edib. Ş.Ağa isə məhz qızının yuxudan oyanmaması üçün şifrəsini verməyə razı olub. 

Jurnalist daha sonra dindirilmə üçün polis idarəsinə aparılıb. Burada müstəntiq vəkillər Şəhla Hümbətova və Fariz Namazlıya zəng etsə də, onlar cavab verməyib. 

“Mən NKVD-nin laborotoriyasında olanda bütün Bakı yatmışdı, hətta İlham Əliyev də. Bircə qolları yanına düşmüş, telefonsuz və internetsiz qalıb ora-bura vurnuxan qardaşım, yuxudan oyanıb yanıqlı-yanıqlı ağlayıb məni soruşan qızım və bütün gecəni NKVD tərəfindən ora-bura dartışdırılaraq əldən salınan mən və siyasi sifarişlə məni həbs etməyə gələnlər…”

Məktubun növbəti hissəsi hələ dərc olunmayıb.

Jurnalist Şəmşad Ağa bu ilin fevralın 5-də “Meydan TV işi” ilə bağlı saxlanılıb və barəsində 2 ay 1 gün müddətinə həbs qətimkan tədbiri seçilib. Ona qarşı  qaçaqmalçılıq — qabaqcadan əlbir olan bir qrup şəxs tərəfindən törədildikdə maddəsi ilə ittiham irəli sürülüb.  

2024-cü il dekabrın 6-da Meydan TV-nin əməkdaşları Ramin Deko, Aynur Elgünəş, Aysel Umudova, Aytac Tapdıq, Xəyalə Ağayeva, Natiq Cavadlı saxlanılıblar. Onlara qarşı qaçaqmalçılıq, əvvəlcədən əlbir olan bir qrup şəxs tərəfindən törədildikdə maddəsi ilə ittiham irəli sürülüb. Bu maddə ilə onların barəsində istintaq dövrü üçün 4 aylıq həbs qətimkan tədbiri seçilib.

Meydan TV əməkdaşları ilə yanaşı, eyni gündə vətəndaş cəmiyyətinin üzvü Ülvi Tahirov da saxlanılıb. Eyni ittihamla onun da barəsində 4 aylıq həbs qətimkan tədbiri seçilib. Onun Meydan TV-yə aidiyyəti yoxdur.

Fevralın 20-də isə jurnalist Nurlan Libre də bu işlə əlaqəli saxlanılıb və barəsində 1 ay 17 gün müddətinə həbs qətimkan tədbiri seçilib.

Fatimə Mövlamlı da fevralın 28-də “Meydan TV” ilə əlaqəli cinayət işinə görə saxlanılıb və barəsində 1 ay 9 gün müddətinə həbs qərarı verilib.

Saxlanılan jurnalistlərin heç biri özünü təqsirli bilmir.