İqtisadiyyat üzrə Nobel mükafatçısı Daron Acemoğlu Ermənistan baş naziri Nikol Paşinyana müxalif olaraq yaradılmış hərəkata qoşulub. 

"Bizim Yol" adlanan, Ermənistanda həbsdə olan milyarder Samvel Karapetyan tərəfindən yaradılan hərəkat Acemoğlunun iqtisadi məsləhətçi kimi qoşulduğunu açıqlayıb. 

Hərəkatın koordinatoru Narek Karapetyan Acemoğlunun hərəkatın milli inkişaf strategiyasını formalaşdıracaq işçi qrupunda iştirak edəcəyini mətbuata təsdiqləyib və bunu “Ermənistan iqtisadiyyatını müasir əsaslar üzərində yenidən qurmaq üçün mühüm tərəfdaşlıq” adlandırıb. 

Türkiyə ermənisi olan Acemoğlu ABŞ-nin Massaçusets Texnologiya İnstitutunun professoru və dünyanın ən nüfuzlu iqtisadçılarından biridir. 

O, 2024-cü ildə həmkarları Ceyms Robinson və Saymon Conson ilə birlikdə “rifahın mənşəyi və inkişafın siyasi iqtisadiyyatı” mövzusundakı araşdırmalarına görə Nobel İqtisadiyyat Mükafatına layiq görülüb. 

Onların tədqiqatları göstərib ki, inklüziv (hamını əhatə edən) siyasi və iqtisadi institutlar davamlı inkişafa gətirib çıxarır, istismarçı sistemlər isə durğunluğa səbəb olur. Bu ideyalar Acemoğlu və Robinsonun 2012-ci ildə nəşr olunan “Millətlər Niyə Uğursuzluğa Uğrayır?" adlı bestseller kitabında geniş müzakirə olunur. 

2018-ci ildə Ermənistanda Məxməri İnqilabdan sonra Paşinyanın yaratdığı hökumət Acemoğlunu iqtisadi islahatlar üzrə məsləhətçi kimi dəvət etmişdi. Sonradan hökumət Acemoğlunun təklif etdiyi islahat planını qəbul etmədiyini açıqlamış və beləliklə, əməkdaşlıq başlanmadan bitmişdi.

Həbsdə olan Samvel Karapetyan tərəfindən təsis edilən “Bizim Yol” hərəkatı 2026-cı il parlament seçkiləri ərəfəsində Ermənistanda ən çox müzakirə olunan yeni siyasi qüvvələrdən birinə çevrilib. 

Rusiya mərkəzli "Tashir Group" holdinqinin sahibi və Ermənistanın ən varlı şəxslərindən biri olan Karapetyan iyun ayında hökumətlə kilsə arasında yaranmış qalmaqal zamanı Ermənistan Apostol Kilsəsini açıq şəkildə müdafiə etdikdən sonra “hakimiyyəti ələ keçirməyə çağırış” ittihamı ilə həbs olunub. 

Narek Karapetyan bildirib ki, “Bizim Yol” üç ay ərzində baş nazirliyə namizədini açıqlayacaq və həmin vaxt hərəkat rəsmi olaraq siyasi partiya kimi qeydiyyatdan keçəcək.