Fərid İsmayılov və Ramil Babayev: “Təcridxanada feldşerlər tibbi spirti məhbuslara içki qismində 10 manata satır”

“Toplum TV işi” üzrə həbs olunanlardan Demokratik Təşəbbüslər İnstitutunun əməkdaşı Ramil Babayev və “Toplum TV”nin jurnalisti Fərid İsmayılov penitensiar müəssisələrdə məhbusların tibbi təminatı ilə bağlı problemlərindən yazıblar.

Onlar Ədliyyə Nazirliyi və Penitensiar Xidmətə ünvanladıqları müraciətdə dərman çatışmazlığı, tibbi xidmətlər üçün ödəniş tələb edilməsi, Müalicə Müəssisəsindəki antisanitar şərait və işgəncə izlərinin sənədləşdirilməsi ilə bağlı suallar veriblər.

“Toplum TV” müraciəti olduğu kimi təqdim edir.

“Penitensiar müəssisələrdə konkret xəstəliklərlə bağlı dərmanlar ümumiyyətlə yoxdur, ilkin yardım dərmanları isə nadir hallarda tapılır. Bu problemin səbəbi nədir, haradadır, kimdir?
Bakı İstintaq Təcridxanasında (BİT) feldşerlər tibbi spirti məhbuslara içki qismində 10 manata satır, Umbakı Penitensiar Müəssisəsində isə feldşerlər müəssisədə tibbi spirt istifadəsinin onlar üçün də qadağan edildiyini bildirərək inyeksiyada belə spirtdən istifadə etmirlər. Bu ifratlar arasında nizam yaratmaq üçün hansısa bir planınız varmı?

Penitensiar Xidmətin Müalicə Müəssisəsində vəziyyət antisanitar olduğu üçün xəstəliyi olan bəzi məhbuslar orada qalmaqdan imtina edir. Antisanitar şəraitdə xəstəliyin müalicəsini təmin etmək necə mümkündür? Bu Müalicə Müəssisəsi nə vaxta qədər yalnız məhbusların mübahisələrini həll etmək, dalaşmaq üçün sövdələşərək üz tutduqları görüş yeri olaraq qalacaq?

BİT-də konkret xəstəliklərlə bağlı müayinə üçün ödəniş tələb edilməsindən və bir neçə dəfə məhbusların ödənişsiz tibbi xidmət tələbləri yerinə yetirilmədiyi üçün etiraz əlaməti olaraq özlərinə xəsarət yetirdiklərindən xəbərdarsınızmı?

İşgəncə ilə ifadə vermiş şəxsləri polis idarələrindən təhvil alarkən təcridxanalar işgəncə izlərini niyə obyektiv şəkildə aktlaşdırmır?

On minlərlə məhbusun həyatı və sağlamlığı bu sualların cavabının nə olmasından asılıdır. Ədliyyə Nazirliyini və Penitensiar Xidməti heç olmasa bu mövzuda hesabatlı olmağa dəvət edirik.”

Ramil Babayev, Fərid İsmayılov - Mütəşəkkil dəstə”