“Toplum TV işi” üzrə 15 il azadlıqdan məhrum edilən, III Respublika Platformasının qurucu heyət üzvü Ruslan İzzətli Cənubi Qafqazda Rusiya, Türkiyə və İranın təsiri barədə yazıb.

Ruslan İzzətlinin yazısını olduğu kimi təqdim edirik.

“Rusiya-Ukrayna müharibəsinin necə nəticələnməsindən asılı olmayaraq, Rusiya iki əsrdir təsir dairəsində saxladığı Cənubi Qafqazdan imtina etməyəcək. Cənubi Qafqaz ölkələrindən kim Moskvanın çətiri altında olmaqdan imtina edəcəksə, sərt reaksiya görəcək. Necə ki, 2008-ci ildə Saakaşvili iqtidarının Moskvanın çətirindən imtinası ərazilərinin işğalı ilə nəticələndi.

Cənubi Qafqazda Saakaşvilidən sonra ikinci cəhdi Ermənistan etməyə çalışır. Paşinyanın qərbyönlü siyasətinə Putin “Qarabağ kartı” ilə cavab verdi. Ənənəvi müttəfiqi İrəvanı İkinci Qarabağ müharibəsində tək qoydu. Ümumiyyətlə, Moskva “Qarabağ kartı” ilə müxtəlif dövrlərdə Azərbaycan və Ermənistanı təzyiq altında saxlayıb, cəzalandırıb.
1992-ci ildə Elçibəy iqtidarını cəzalandırmaq üçün “Qarabağ kartı”ndan necə istifadə etdisə, 2020-ci ildə də Paşinyan iqtidarını cəzalandırmaq üçün istifadə etdi.

Bu gün Moskvanın əlində “Qarabağ kartı” olmasa da, Yerevana və Bakıya təzyiq etmək üçün kifayət qədər siyasi-iqtisadi vasitələri var. Yerevanın Moskvanın təzyiqləri qarşısında dayanıqlı olması regionda sülhün hakim olması deməkdir. Bu yöndə Bakı və Yerevan siyasi-iqtisadi baxımdan birlikdə addım atmalıdırlar.
Öncə Ankara və Yerevan tez bir zamanda sərhədləri açmalıdırlar. Türkiyənin regiona girməsi vacibdir. Moskva və Tehrana alternativ olaraq Ankaranın regionda möhkəmlənməsi Cənubi Qafqazda sülhün və təhlükəsizliyin davamlılığı üçün önəmlidir.

Bakının son günlər Ankara ilə münasibətlərinin soyuması regionda güclənməyə çalışan Moskva-Tehran ikilisinin maraqlarına xidmət edir.
1918-ci ildə də, İkinci Qarabağ müharibəsi dövründə də dövlətimizin, millətimizin yanında olan Türkiyə şimaldan və cənubdan gələn təhlükələr qarşısında əsas müttəfiqimizdir. Əliyev hakimiyyəti şəxsi maraqları çərçivəsində dövlət maraqlarımızı təhlükəyə atıb, əbədi müttəfiqimiz Türkiyə ilə münasibətlərimizin zərər görməsinə çalışmamalıdır”.