"Meydan TV işi" üzrə həbsdə olan jurnalist Ülviyyə Əli (Quliyeva) ABŞ senatoru Cin Şehinin ona yazdığı məktuba cavab verib. 

 "Toplum TV" məktubu olduğu kimi təqdim edir. 

"Salam, hörmətli Cin Şehinin!

İlk öncə diqqətiniz üçün təşəkkür edirəm! 

Bu gün mənim ad günümdür və mən Azərbaycan dövlətinin şərlənməsinə məruz qalmışam deyə doğum günümü yaxınlarımla, azadlıqda deyil, dəmir barmaqlıqlar ardında keçirməyə məcbur buraxılmışam. 

Əlbəttə, biz həqiqət uğrunda mübarizə yoluna girəndə, jurnalistikanın peşə etikasına sadiq qalanda çətinliklərlə üzləşəcəyimizi bilirdik və buna hazır idik. Çox sevinirəm ki, hazırda tarixin doğru üzündə dayanmışam və məşəqqətli olsa da nikbinliyimi qoruyub saxlaya bilirəm. 

Çox təəssüf ki, hazırda dünyada iqtisadi maraqlar insan haqlarından daha prioritet müstəvidə tutulur. Heç kimə sirr deyil ki, insan haqları məsələsi çoxdan al-ver predmetinə çevrilib. Müharibələri başladanlar, minlərlə insanların ölümünə fərman verənlər özlərini sülh carçısı elan etməkdən çəkinmirlər. Lakin unutmaq olmaz ki, hər müharibə dünyanı daha da avtoritarlaşdırır, istismarçı, hegemonluq etmək istəyən dövlətləri söz sahibinə çevirir. 

İnsan haqlarını öz riyakarlıqlarında istifadə etmək istəyənlərin sırasında olmadığınız üçün sizə təşəkkür edirəm. Bir gün ədalətin və həqiqi sülhün zəfər çalacağı ümidi ilə,

Ülviyyə Əli 
13.10.2025, Bakı İstintaq Təcridxanası" 

Cin Şehin Ülviyyə Əliyə yazdığı məktubda onun azadlığı üçün əlindən gələni edəcəyini bildirmişdi. 

O, analoji məktubları həbsdə olan "Toplum TV" həmtəsisçisi Ələsgər Məmmədli və "Azadlıq Radiosu"nun jurnalisti Fərid Mehralızadəyə də yazıb. 

Mayın 7-də “Meydan TV işi” üzrə həbs olunan Ülviyyə Əli jurnalist kimi “Amerikanın Səsi” ilə əməkdaşlıq edib. 

Bu media qurumu ilə əməkdaşlığını bitirəndən sonra da öz sosial media hesablarında siyasi motivli məhkəmələrdən reportajlar yayımlamağa davam edib. 

2024-cü il dekabrın 6-da “Meydan TV işi” üzrə saytın Azərbaycan nümayəndəliyinin rəhbəri Aynur Elgünəş, jurnalistlər Ramin Deko, Aysel Umudova, Aytac Tapdıq, Xəyalə Ağayeva və Natiq Cavadlı saxlanılıblar.

Sonradan “Arqument.az” saytının baş redaktoru, Meydan TV ilə əməkdaşlıq edən jurnalist Şəmşad Ağayev (Ağa), jurnalistlər Nurlan Libre (Qəhrəmanlı), Fatimə Mövlamlı, Ülviyyə Əli və fotoqraf Əhməd Muxtar da “Meydan TV işi”nə görə həbs edilib.
Saxlanılan jurnalistlərin heç biri özünü təqsirli bilmir.