“Gürcüstanın Avropa Şurası Parlament Assambleyasında (AŞPA) iştirakı seçim deyil, öhdəlikdir. Çünki nümayəndə heyəti üzvlərinin mandatları var və ratifikasiya olunub”.

Bunu AŞPA prezidenti Teodoros Russopulos media nümayəndələri ilə söhbətində deyib.


“Parlament Assambleyası qismən razılaşma deyil, bu, iştirakı seçim deyil, öhdəlik olan nizamnamə orqanıdır. Etimadnamələr qəbul edildiyindən onlar Assambleyada olmalıdırlar. Bu onların öhdəliyidir” deyə o bildirib. 

AŞPA prezidenti əlavə edib ki, bu, “Gürcüstanda demokratik standartların irəliləməsinə kömək edə biləcək dialoqa təhlükə yaradır”.

Yanvarın 29-da AŞPA Gürcüstan hakimiyyətinin yeni seçkilər keçirmək, “bütün siyasi məhbusları” azad etmək, “polis zorakılığı və insan haqları pozuntularını dərhal dayandırmaq” şərti ilə Gürcüstan nümayəndə heyəti üzvlərinin mandatlarını qismən təsdiq edib.

Bu qərarın qəbulundan sonra “Gürcü arzusu”nun AŞPA-dakı nümayəndə heyətinin rəhbəri Tea Tsulukiani bəyan edib ki, Gürcüstan AŞPA-da fəaliyyətini dayandırır, çünki Assambleyanın qoyduğu şərtlər, yəni yeni seçkilərin keçirilməsi ədalətsizdir və Gürcüstanın suverenliyini pozur.

Russopulos həmçinin qeyd edib ki,  ilk dəfədir nümayəndə heyətinin mandatı təsdiqlənir, lakin onlar ssambleyada iştirakdan imtina edir. O, izah edib ki, Azərbaycanın işi başqadır, çünki onun nümayəndə heyətinin mandatları ümumiyyətlə ratifikasiya olunmayıb.

Azərbaycanın qurumdakı səsvermə hüququ 2024-cü ilin yanvarında dondurulub. Buna səbəb kimi Azərbaycanın insan hüquqları ilə bağlı götürdüyü öhdəlikləri yerinə yetirməməsi göstərilib. 

Azərbaycan hakimiyyəti də buna cavab olaraq qurumla əməkdaşlığı və təşkilatda iştirakını qeyri-müəyyən müddətə dayandırmaq qərarını elan edib.

Sonradan rəsmi Bakı, həmin müzakirələrdə bu qərara səs vermiş deputatları qara siyahıya salaraq onların Azərbaycana gəlişinə məhdudiyyət qoyub. Rəsmilər bir neçə dəfə bildiriblər ki, nümayəndə heyətinin mandatı bərpa olunandan sonra əməkdaşlığa hazırdırlar.