Oktyabrın 1-də Bakı Ağır Cinayətlər Məhkəməsində Siyasi Menecment İnstitutunun həbsdə olan direktoru Azər Qasımlının işi üzrə növbəti məhkəmə prosesi keçirilib. 

"Azadlıq Radiosu"nun xəbərinə görə, prosesdə A.Qasımlı sərbəst ifadə verib. O, necə həbs olunmasından və zərərçəkmiş qismində tanınan Qurbanəli Yusifovla münasibətlərindən danışıb. 

Məhkəmədə hakim Telman Hüseynovla politoloqun vəkili Rövşanə Rəhimova arasında mübahisə yaşanıb. R.Rəhimova əvvəlki iclaslarda A.Qasımlının vəkillərinin yanında əyləşməsinə qərar verilsə də, yenə də şüşə kabinədə saxlanıldığına diqqət çəkib. Vəkil müvəkkilinin oradan çıxarılmasını, yanında əyləşməsini tələb edib. Hakim isə cavabında vəkili Vəkillər Kollegiyasına şikayət etməklə hədələyib.

Ardınca A.Qasımlı ifadə verib. Politoloq ona verilən "hədə-qorxu ilə tələbetmə" ittihamını "şər-böhtan" adlandıraraq, siyasi motivlərlə həbsdə saxlandığını söyləyib.

A.Qasımlı Q.Yusifovu hədələdiyi ittihamına cavab olaraq deyib ki, heç öz uşaqları ilə hədə-qorxu ilə danışmır və onu "pula görə kiminsə övladını oğurlamaqda suçlamaq absurddur". 

Q.Yusifovla əvvəldən tanış olduğunu deyən A.Qasımlının sözlərinə görə, onun vasitəsilə "Binance" kriptovalyuta birjasına sərmayə edib və "Bitcoin" alıb.

Aralarındakı narazılığın necə yarandığından danışan politoloq bildirib ki, Q.Yusifovun üzündən böyük zərərə düşüb: "Mən demişdim ki, "Bitcoin"u sərmayə məqsədilə alıram. Bu, başqa əmlaka – evə, avtomobilə pul yatırmaq kimidir. Sanki ev almışam, açarı da bu adamdadır. Bu adam da o evi yox edib. Aramızdakı narazılıq bundan yaranıb".

A.Qasımlı deyib ki, qarşı tərəflə aralarındakı pul məsələsi mülki mübahisədir və Bakı Ağır Cinayətlər Məhkəməsində baxılmalı məsələ deyil. O, Q.Yusifovun da borclu olduğunu etiraf etdiyini xatırladıb: "İndi bir halda ki, mənə "hədə-qorxu ilə tələbetmə" ittihamı veriblər, ortaya sübut qoyulmalıdır. Gözləyirdim ki, istintaq bununla bağlı sübutlar gətirəcək, üzümə şahidlər qoyacaqlar. Heç nə yoxdur, ola da bilməzdi, çünki belə bir hal baş verməyib".

A.Qasımlı Q.Yusifovla aralarındakı pul məsələsinə mülki qaydada Mingəçevir Şəhər Məhkəməsində baxıldığını və özünün xeyrinə qərar çıxarıldığını xatırladıb. Məhkəmə qərar verib ki, Q.Yusifov pulu ona ödəməlidir. 

"Bir müddət sonra nə baş verirsə, Daxili İşlər Nazirliyinə məktub yazır, sosial şəbəkələrdə status paylaşır ki, "Azər Qasımlı məni dövlətə, dövlətçiliyə qarşı qaldırırdı, alınmayanda təhdidlə pul tələb etməyə başladı". Bir tərəfdən bunu deyir, o biri tərəfdən də "Bitcoin" məsələsi ilə əlaqədar borclu olduğunu etiraf edir. Bunun özü sübut edir ki, həbsim siyasi siyasi sifarişdir", - A.Qasımlı deyib. 

Politoloq həbsindən öncə onun ölkədən çıxışına qadağa qoyulduğunu, Almaniyaya getmək istəyərkən hava limanından buraxılmadığını yada salıb. Onun sözlərinə görə, o, ötən ilin noyabrında həbsinə hazırlıq getdiyini artıq bilirmiş.

O bildirib ki, ötən ilin dekabrın 7-də oğlunu futbol məşqinə apararkən saxlanılıb.

"Bu cür davranışa nə ehtiyac vardı? Onsuz da hara çağırsalar, gələcəkdim...", - A.Qasımlı bildirib. 

Politoloqun məhkəməsi oktyabrın 8-də davam edəcək.