ABŞ prezidenti Donald Trampın administrasiyası ötən ay qətlə yetirilmiş mühafizəkar fəal Çarli Kirkin ölümünə lağ etdikləri iddia olunan altı əcnəbiyə verilmiş vizaları ləğv edib.

ABŞ Dövlət Departamenti oktyabrın 14-də "X" səhifəsində bildirib ki, sözügedən şəxslər sosial şəbəkələrdə Kirkin ölümünü bayram ediblər və buna görə onların vizalarının ləğv edilməsinə qərar verilib.

Şəxslərin adları açıqlanmasa da, onların Braziliya, Argentina, Almaniya, Paraqvay, Meksika və Cənubi Afrika Respublikasından olduğu bildirilir. 

Daha sonra Dövlət Departamentinin səhifəsində şəxslərin adları gizlədilməklə onların sosial şəbəkə hesablarından olduğu iddia edilən, Kirk haqqında paylaşımları göstərilib. 

"Kirk kimi adamlara empatiyanız varsa, məni dostluqdan çıxara bilərsiniz. Bütün ömrünü irqçi, ksenofobik, seksist ritorikaya həsr etmiş bir adamın ölümü zərrə qədər vecimə deyil. O, layiq olduğu yerdədir", - argentinalıya aid olduğu iddia edilən paylaşımda yazılıb. 

"Prezident Tramp və Dövlət katibi Marko Rubio immiqrasiya qanunlarını tətbiq etməklə sərhədlərimizi, mədəniyyətimizi və vətəndaşlarımızı müdafiə edirlər. Amerikanın qonaqpərvərliyindən faydalanaraq vətəndaşlarımızın qətlini bayram edən əcnəbilər ölkədən çıxarılacaqlar", - deyə bəyanatda vurğulanır. 

Oktyabrın 14-də, həmçinin, Tramp Kirkə ölümündən sonra ölkənin ən yüksək mülki mükafatı olan Azadlıq Medalını verib. O, mükafatı Kirkin həyat yoldaşına təqdim edib.

Trampın ən yaxın müttəfiqlərindən olan, universitet kampuslarında ictimai debatlar etməsi ilə tanınan 31 yaşlı Kirk sentyabrın 10-da Yuta ştatındakı universitetdə çıxış edərkən avtomatdan açılan atəşlə öldürülüb. 

Tramp sentyabrda Kirkin anım mərasimində onu “böyük amerikalı qəhrəman” və “azadlıq şəhidi” adlandırıb.

Kirkin ölümündən sonra Tramp Administrasiyası fəal haqqında sosial mediada edilən neqativ şərhlərə görə jurnalistlər, müəllimlər və digər peşə sahiblərinin işdən çıxarılmasını dəstəkləyib. 

Bu cür cəza tədbirləri liberal qruplar arasında ölkədə söz azadlığı ilə bağlı narahatlıqlar yaradıb.