Yasamal rayonunda Bayırşəhər ərazisində yerləşən, dövlət reyestrində yer alan memarlıq abidəsinin söküntüsü gedir. 

Molla Vəli Vidadi 62 ünvanında yerləşən binanın söküntüsünün videogörüntüsünü memar Abdul Hüseynov iyulun 6-da sosial media hesabında ictimailəşdirib. 

A.Hüseynovun “Toplum TV”-yə dediyinə görə, bina 1893-cü ildə inşa olunub və 2001-ci ildə yerli əhəmiyyətli memarlıq abidələrinin siyahısına daxil edilib. 

Memarın sözlərinə görə, iyulun 6-da Mədəni İrsin Qorunması, İnkişafı və Bərpası üzrə Dövlət Xidmətinin nümayəndəsi ünvana baş çəkib və binanın bir hissəsinin, xüsusilə şüşəbəndinin sökülməli olduğunu bildirib. 

Yazı dərc olunanan qədər qurumdan iddiaya cavab almaq mümkün olmayıb. 

A.Hüseynov isə deyir ki, bina şüşəbəndlə birlikdə dövlət reyestrinə daxil edilib və onun söküntüsü qanunsuzdur. 

“Balkon memarlıq abidəsinin bir hissəsi hesab olunur, çünki o, yaşayış binasının ənənəvi elementidir. Şüşəbəndlər, adətən, evin həyət olan tərəfindən tikilirdi və nəhayət, bina memarlıq abidələri siyahısına əlavə edildikdə, o, artıq evlə birlikdə qəbul edilib və buna görə də irsin bir hissəsidir. Onu dağıtmaq olmaz, bərpa etmək lazımdır. Bundan əlavə, bu cür vəziyyətlərdə tarixi binaların bütövlüyünü qorumaq vəzifəsi daşıyan vəzifəli şəxslərin səriştəsizliyi xoşagəlməz dərəcədə təəccüblüdür. Bunlar qapı, pəncərə və ya eyvan kimi ayrı-ayrı hissələr deyil, bütöv bir binadır”, - o qeyd edib. 

Mədəni İrsin Qorunması, İnkişafı və Bərpası üzrə Dövlət Xidmətinin rəis müavini Rauf Axundovun adından ötən ay bina sakininə göndərilən məktubda da qeyd olunur ki, bina memarlıq abidəsi kimi dövlət mühafizəsinə götürülüb. 

Sakinlərin dediyinə görə, binada söküntü iyulun 7-də də davam edib. 

Bir ildən çoxdur ki, Bayırşəhərdə tarixi binaların və məhəllələrin söküntüsü gedir və yaşı 100-dən çox olan bir neçə bina sökülüb. 

Yasamal Rayon İcra Hakimiyyəti söküntünün ərazidəki Qış Parkının genişləndirilməsi üçün aparıldığını deyir. 

Bakının 2040-cı ilə qədər nəzərdə tutulmuş baş planına əsasən, Bayırşəhərdə Təzəpir məscidi ətrafındakı ərazi "xüsusi mühafizə olunan ərazi" statusuna malikdir. 

Bu statusa əsasən isə, ərazidə söküntü deyil, yalnız yenidənqurma və reabilitasiya işləri aparıla bilər. Sakinlər isə yalnız zəruri olduqda müvəqqəti şəkildə yaxınlıqdakı ərazilərə köçürülə bilərlər.