ABŞ-nin Minneapolis şəhərində İmmiqrasiya və Gömrük Mühafizəsi Xidmətinin (ICE) əməkdaşı bir qadını güllələyib. Federal hakimiyyət orqanları hadisənin özünümüdafiə aktı olduğunu bildirir. Onların iddiasına görə, qadın avtomobillə xitmət əməkdaşını vurmağa cəhd edib.

Həlak olan şəxs 37 yaşlı Rene Nikol Quddur. O, ABŞ vətəndaşı idi və altı yaşlı övladı var. Qud sosial şəbəkə hesablarında özünü “şairə və yazıçı, həyat yoldaşı və ana” kimi təqdim edirdi.

Sosial mediada yayımlanan hadisə videolarında İmmiqrasiya və Gömrük Mühafizəsi Xidmətinin əməkdaşının yolun ortasında dayanmış avtomobilə yaxınlaşdığı, sürücüdən qapını açmağı tələb etdiyi və qapının dəstəyindən tutduğu görünür. 

Bundan sonra avtomobil irəli hərəkət etməyə başlayır. Avtomobilin qarşısında dayanan digər əməkdaş silahını çıxararaq yaxın məsafədən ən azı üç dəfə avtomobilə atəş açır və geri sıçrayır. Videodan avtomobilin zabitlə toqquşub-toqquşmadığı aydın görünmür. Daha sonra avtomobil böyük sürətlə yol kənarında park edilmiş iki maşına çırpılır və qəfil dayanır.

ABŞ-nin Daxili Təhlükəsizlik Naziri Kristi Noem bildirib ki, Qud avtomobillə xidmət əməkdaşlarının yolunu kəsib və yolu açmaqdan imtina edib. “Daha sonra o, hüquq-mühafizə orqanının əməkdaşını vurmağa cəhd göstərib”, - deyə nazir qeyd edib. Noem baş verənləri “daxili terrorizm” kimi qiymətləndirib və Federal Təhqiqatlar Bürosunun (FBI) araşdırmaya başladığını açıqlayıb.

Hadisəyə ABŞ prezidenti Donald Tramp da münasibət bildirib. O, qadını “peşəkar təxribatçı” adlandıraraq, avtomobili “son dərəcə nizamsız şəkildə idarə etdiyini və müqavimət göstərdiyini”, daha sonra isə “ICE əməkdaşını qəsdən vurduğunu” iddia edib. 

Minneapolis şəhərinin meri Ceykob Frey ICE əməkdaşının özünümüdafiə məqsədilə atəş açması iddiasını qəti şəkildə rədd edib. Onun sözlərinə görə, atəş açılmasını əks etdirən video bu versiya ilə birbaşa ziddiyyət təşkil edir.

“Reuters” agentliyinin yazdığına görə, atışmanın baş verdiyi ərazidə improvizə olunmuş memorial yaradılıb və bir neçə min insan toplaşıb. Trampın əleyhdarları ABŞ-nin bir sıra şəhərlərində etiraz aksiyalarına çağırıblar. Məlumata görə, insanlar 10-dan çox şəhərdə küçələrə çıxıblar.

Bundan əvvəl Daxili Təhlükəsizlik Nazirliyi Minnesota ştatında “tarixin ən böyük əməliyyatının” keçirildiyini açıqlamışdı. Əməliyyata iki min ICE əməkdaşı cəlb olunub. Kristi Noemin sözlərinə görə, son həftələr ərzində 1500 nəfər saxlanılıb. Bu tədbirlər, somalili immiqrantların da adının hallandığı genişmiqyaslı sosial müavinət fırıldağı ittihamlarından sonra həyata keçirilib.