ABŞ və İran iki həftə müddətinə atəşkəs barədə razılığa gəliblər. 

ABŞ prezidenti Donald Tramp daha öncə İrana verdiyi möhlətin başa çatmasına iki saat qalmış "Truth Social" platformasında Pakistanın vasitəçiliyi ilə iki həftəlik atəşkəsə razılaşdığını yazıb. 

"İran Hörmüz boğazını tam, dərhal və təhlükəsiz şəkildə açmağa razı olması şərti ilə, mən İranın bombalanmasını və hücumu iki həftəlik müddətə dayandırmağa razıyam. Bu, ikitərəfli atəşkəs olacaq. Bunun səbəbi odur ki, biz artıq bütün hərbi məqsədlərə nail olmuş və hətta onları aşmışıq, həmçinin İranla uzunmüddətli sülh və Yaxın Şərqdə sülh üzrə yekun razılaşmaya doğru xeyli irəliləmişik", - o qeyd edib. 

Tramp İrandan 10 maddəlik təkliflər paketi aldıqlarını əlavə edib və bildirib ki, bu, "danışıqlar üzərində işləmək üçün əsas" olacaq. 

Daha sonra başqa bir paylaşımında ABŞ prezidenti aprelin 7-nin “dünyada sülh üçün böyük bir gün” olduğunu vurğulayıb və bildirib ki, İran üçün artıq “bəsdir”. O əlavə edib ki, ABŞ Hörmüz boğazında yaranan gəmi sıxlığını aradan qaldırmağa kömək edəcək və “böyük pullar qazanılacaq”.

İranın xarici işlər naziri Abbas Əraqçı Trampın açıqlamasından az sonra bəyanat yayaraq ölkəsinin atəşkəsə razılaşdığını bildirib. 

O, iki həftə ərzində Hörmüz boğazı vasitəsilə təhlükəsiz keçidin İran ordusu ilə koordinasiyalı şəkildə mümkün olacağını deyib. 

Pakistan ABŞ və İranı aprelin 10-da İslamabadda  danışıqlar aparmağa dəvət edib. Tehran buna hazır olduğunu bildirib, amma Vaşinqton hələ ki dəvəti açıq şəkildə qəbul etməyib. 

Tramp "Agence France‑Presse" agentliyinə açıqlamasında deyib ki, onun fikrincə Çin İrana danışıqlara razılaşmaq üçün təsir göstərib. 

İsrail baş naziri Benyamin Netanyahu da ABŞ‑nin İranla atəşkəsini dəstəklədiyini bildirib, amma bu razılaşmaya Livandakı "Hizbullah" qruplaşmasına qarşı döyüşlərin aid olmadığını əlavə edib.

Pakistanın baş naziri Şəhbaz Şərif daha öncə demişdi ki, razılaşdırılmış atəşkəs “hər yeri, o cümlədən Livanı da əhatə edir”.

İranın dövlət mediasının açıqladığı 10 maddəlik təkliflər paketində İrana qarşı sanksiyaların qaldırılması, Hörmüz boğazına İranın nəzarət etməsi, ABŞ ordusunun Yaxın Şərqi tərk etməsi, İrana dəymiş zərərə görə təzminat ödənməsi və başqa tələblər var.