ABŞ-nin CNN telekanalı Rusiyanın Ukraynada ön cəbhəyə göndərdiyi, müxtəlif Afrika ölkələrindən olan şəxslər haqda araşdırma yayımlayıb. 

Araşdırmada zorla döyüşə göndərildiyi iddia olunan şəxslər və onların ailə üzvlərindən müsahibələr alınıb.

Bu şəxslərdən 35 yaşlı keniyalı Fransis Endanqu ötən ilin iyulunda Rusiyaya qaynaqçı işləməyə gedib. Lakin ailəsi oktyabrdan onunla əlaqəni itirib. Dekabrda isə Endanqunun afrikalılara çağırış etdiyi bir video qəbul ediblər. 

Videoda o, afrikalılara Rusiyaya hər hansı iş təklifindən ötrü getməmələri barədə xəbərdarlıq edir. “Əgər getsəniz, hərbi xidmətdə olmamısınızsa belə, sizi orduya yazacaqlar və birbaşa cəbhə xəttinə göndərəcəklər. Burada əsl qətliam baş verir", - o deyir. 

Bir həftə sonra isə Fransisin olduğu həssas məzmunlu bir video sosial mediada sürətlə yayılıb. Videoda hərbi formada, sinəsinə mina bağlanmış vəziyyətdə Fransis görünür. Rusca danışan və irqçi ifadələr işlədən bir şəxs isə onun Ukrayna ordusunun mövqelərini yarmaq üçün “konserv açan” kimi istifadə olunacağını deyir.

"Bu uşaqları evlərinə qaytarmaq üçün Keniya və Rusiya hökumətlərinə birgə çağırış edirəm. Onlara real işlər barədə yalan danışılıb və indi həyatları təhlükə altında, bir müharibənin içindədirlər", - Endanqunun anası CNN-ə deyib. 

CNN-in araşdırması Rusiyanın Afrikada apardığı cəlbetmə taktikaları ilə bağlı yeni detalları üzə çıxarıb. Araşdırma afrikalı iş axtaranlara verilən parlaq vədləri və onların çoxunun üzləşdiyi məcburi hərbi xidmət və qanlı cəbhə döyüşləri ilə bağlı reallığı ifşa edir.

CNN Rusiyanın sıralarını gücləndirmək üçün afrikalı kişiləri necə cəlb etdiyini göstərən, messencer tətbiqlərindəki yüzlərlə yazışmanı, hərbi müqavilələri, vizaları, uçuş və hotel bronlarını nəzərdən keçirib, həmçinin Ukraynada döyüşən afrikalı şəxslərin birbaşa ifadələrini toplayıb.

Botsvana, Uqanda, Cənubi Afrika Respublikası və Keniya da daxil olmaqla bir neçə Afrika ölkəsi problemin miqyasını etiraf edib.

Rusiyanın Müdafiə və Xarici İşlər nazirlikləri çağırılan şəxslərin aldadılması və ya məcbur edilməsi ilə bağlı iddialara dair CNN-in sorğusuna cavab verməyib.

CNN hələ də Ukraynada olan - Qana, Nigeriya, Keniya və Uqandadan 12 afrikalı döyüşçü ilə danışıb. Onlar sürücü və ya mühafizəçi kimi mülki işlərin təklif edildiyini bildiriblər. Əksəriyyəti müqavilə imzalanarkən 13 min dollar mükafat, ayda 3500 dollara qədər maaş və xidmətin sonunda Rusiya vətəndaşlığı vəd edildiyini deyib.