ABŞ prezidenti Donald Tramp BBC telekanalını məhkəməyə verib. 

BBC-nin məlumatına görə, Tramp böhtan iddiası ilə şirkətdən 5 milyard dollar məbləğində təzminat tələb edir. 

Buna səbəb BBC-nin ötən il yayımlanan sənədli filmdə prezidentin çıxışını təhrif etməsidir. BBC daha öncə açıqlamasında bildirib ki, sözügedən filmdə Trampın 2021-ci il yanvarın 6-dakı çıxışına montaj edilib və onun tərəfdarlarını Kapitoli binasında "birbaşa zorakı hərəkətə təşviq etdiyi kimi yanlış bir təəssürat yaradıb”.

Telekanal buna görə Trampdan üzr istəyib və filmin yenidən efirə verilməyəcəyini qeyd edib, lakin təzminat ödəməkdən imtina edib.  

Trampın vəkilləri isə daha öncə BBC-dən həmin materiala görə üzr istəməkdən əlavə ona təzminat ödəməyi tələb edib.

Ötən ilin noyabrında yayımlanan sənədli film yalnız bu yaxınlarda BBC prodüserlərini tənqid edən daxili yazışmaların sızmasından sonra yenidən gündəmə gəlib.

Hadisədən sonra BBC-nin baş direktoru Tim Deyvi və xəbər şöbəsinin rəhbəri Deborah Törness qalmaqal fonunda istefa veriblər.

Tramp bu istefaları “Truth Social” platformasında alqışlayaraq onları “korrupsioner” və “nadürüst insanlar” adlandırıb.

BBC-nin sədri Samir Şah isə noyabrın 10-da sözügedən kadrın “aldadıcı” olduğunu etiraf edib və “səhv qərar” üçün üzr istəyib, lakin qurumun sistemli şəkildə qərəzli olması ilə bağlı iddiaları rədd edib.

Sənədli filmdə Trampın “Tam gücümüzlə mübarizə aparacağıq” cümləsini “Kapitoliyə gedəcəyik” ifadəsindən dərhal sonra söylədiyi göstərilir.

Əslində isə Tramp Kapitoliyə getmək barədə bəyanatından sonra “cəsur senatorlarımızı və konqresmenlərimizi dəstəkləyəcəklərini” deyib, “mübarizə aparmaq” ifadəsini isə təxminən bir saat sonra işlədib.

Trampın bu məhkəmə iddiası onu tənqid edən media qurumlarını cəzalandırmaq cəhdlərinin növbətisidir.

O, ikinci prezidentliyi dövründə indiyə qədər “The New York Times”, “The Wall Street Journal” və “ABC News”-a qarşı böhtan iddiaları qaldırıb, həmçinin NPR və PBS-ə dövlət maliyyəsini azaldıb, “Associated Press” müxbirlərinin Ağ Evə akkreditasiyasını ləğv edib.