Hindistan ABŞ prezidenti Donald Trampın bu ölkənin Rusiyadan neft idxalını dayandırmağa razı olduğu barədə iddiasını təkzib edib. 

Bu isə iki ölkə arasındakı gərginliyə səbəb olan məsələnin yaxın zamanda həll olunmayacağını göstərir.

Tramp oktyabrın 15-də bildirib ki, Hindistanın baş naziri Narendra Modi onu “bu gün Hindistanın daha Rusiyadan neft almayacağı barədə əmin edib". Tramp bunu “böyük addım” adlandırıb.

Lakin oktyabrın 16-da Hindistan Xarici İşlər Nazirliyinin sözçüsü Randhir Caisval jurnalistlərə bildirib ki, Tramp və Modi arasında belə bir söhbətdən, eləcə də Hindistanın Rusiyadan neft alımını dayandıracağına dair "hər hansı bir təminat verməsindən xəbəri yoxdur”.

Həmin günün əvvəlində Hindistan Xarici İşlər Nazirliyi Rusiyanın adını çəkmədən bəyan edib ki, ölkə “neft və qazın mühüm idxalçısı" olmağa davam edir. 

Bəyanatda deyilir: “Enerji qiymətlərinin sabitliyini və təchizatın təhlükəsizliyini təmin etmək enerji siyasətimizin iki əsas məqsədidir. Buna, həmçinin, enerji mənbələrimizin genişləndirilməsi və bazar şəraitinə uyğun olaraq şaxələndirilməsi daxildir.”

Hindistan uzun illərdir Kremllə yaxın münasibətlər saxlayır və bu ilin sonlarında Rusiya prezidenti Vladimir Putini qəbul etməyə hazırlaşır.

2022-ci ildə Moskvanın Ukraynanı işğalından sonra Hindistan Rusiya neftinin ən böyük alıcılarından birinə çevrilib.

Müharibə Rusiyanın neft sənayesinə qarşı geniş sanksiyalara səbəb olub və qiymətlərin kəskin enməsinə gətirib çıxarıb.

Bir neçə aydır ki, Hindistan Trampın Rusiyadan neft alışını dayandırmaq çağırışlarına qarşı çıxır və bildirir ki, 1,4 milyarddan çox əhalisi olan ölkə sürətlə böyüyən iqtisadiyyatının enerji ehtiyaclarından güzəştə getməyəcək.

Avqust ayında Tramp Hindistanın Rusiyadan neft və qaz idxal etməsinə görə cəza kimi Hindistan məhsullarına əlavə 25 faiz tarif tətbiq etdiyini elan edib. Bu qərar daha əvvəl elan olunmuş 25 faizlik tarif dərəcəsinə əlavə olaraq qəbul edilib.