ABŞ prezidenti Donald Tramp noyabrın 19-da Ədliyyə Nazirliyindən “Epşteyn faylları” kimi tanınan sənədlərin ictimaiyyətə açıqlanmasını tələb edən qanun layihəsini imzalayıb.

“Epşteyn faylları” milyarder iş adamı, azyaşlıların cinsi istismarı məqsədilə alverində təqsirləndirilən Cefri Epşteynə dair istintaq materiallarını əhatə edir.

Epşteyn 2019-cu ilin iyulunda həbs edilib və bir ay sonra həbsxanada ölü tapılıb. Rəsmilər onun intihar etdiyini bildirsələr də, bir çox amerikalı buna şübhə ilə yanaşır.

İttiham aktında qeyd olunur ki, Epşteyn aralarında azyaşlıların da olduğu çoxlu sayda qızı özünə məxsus adaya apararaq cinsi istismara məruz qoyub.

İş üzrə sənədlərin böyük hissəsinin illərlə məxfi saxlanılması ABŞ ictimaiyyətində müxtəlif konspiroloji nəzəriyyələrin yaranmasına səbəb olub.

Bəzi iddialara görə, Epşteynlə yaxın münasibətdə olmuş tanınmış şəxslər də həmin adaya gedib və cinsi istismarda iştirak edib. Bu şəxslər arasında prezident Tramp, milyarder Bil Qeyts, Britaniya şahzadəsi Endryu və keçmiş ABŞ prezidenti Bill Klintonun adı çəkilir.

Endryu ötən ayın sonunda özü bunu inkar etsə də, haqqında irəli sürülən ittihamlarla bağlı Britaniya kralı tərəfindən şahzadə titulundan məhrum edilib.

Digər bir iddiaya əsasən, adaya gedən şəxslər gizli şəkildə videoya çəkilib və bu materiallar kompromat kimi toplanıb. Bu nəzəriyyəni irəli sürənlər bunun arxasında əsasən ABŞ və ya İsrail kəşfiyyatının dayandığını iddia edirlər.

Tramp biznesmen olduğu dövrdə Epşteynlə yaxın olub və bu, bir neçə fotoda əksini tapıb. Lakin prezident olaraq bu yaxınlığı təkzib edir və cinsi istismarla bağlı heç nə bilmədiyini bildirir.

Tramp administrasiyasının uzun müddət “Epşteyn faylları”nın ictimailəşdirilməsinə qarşı çıxması da onun adının sənədlərdə keçdiyi ehtimalını gücləndirirdi. Ədliyyə Nazirliyi bunu sənədlərin açıqlanmasının milli təhlükəsizliyə təhdid yarada biləcəyi ilə əsaslandırırdı.

Lakin son bir həftədə Tramp mövqeyini dəyişib və Respublikaçı konqresmenləri sənədlərin ictimailəşdirilməsi üçün hazırlanan qanun layihəsini dəstəkləməyə çağırıb.

Noyabrın 18-də Konqresin mütləq çoxluğu layihənin lehinə səs verib.

Qanuna əsasən, Ədliyyə Nazirliyi növbəti bir ay ərzində sənədləri ictimaiyyətə açıqlamalıdır.