Bakıda “Qış parkı”nın salınması zamanı sökülən evlərlə bağlı daha bir qrup vətəndaşın şikayəti üzrə Avropa İnsan Hüquqları Məhkəməsi (AİHM) kompensasiya məbləğini müəyyənləşdirib. “Azadlıq Radiosu” yazır ki, noyabrın 3-də açıqlanan qərara əsasən, Azərbaycan hökuməti mülkiyyət hüquqları pozulmuş 13 ərizəçiyə ümumilikdə 751 min 250 avro təzminat ödəməlidir.

Kompensasiya alacaq şəxslər arasında Ağ Partiya sədri Tural Abbaslının anası Başxanım Abbasova da var. Məhkəmənin qərarına əsasən, ona dəymiş maddi ziyana görə 104 min 500 avro, mənəvi ziyana görə isə 3 min avro ödənilməlidir.

AİHM bu iş üzrə ilk qərarını 2025-ci ilin fevralında çıxarıb. Həmin qərarda 13 ərizəçinin mülkiyyət hüququnun pozulduğu müəyyən edilib. Məhkəmə qeyd edib ki, əmlakların dövlət ehtiyacları üçün alınması prosesində qanunvericiliyin tələblərinə əməl olunmayıb.

Bununla belə, həmin mərhələdə təzminatın konkret məbləği ilə bağlı yekun qərar verilməyib. AİHM tərəflərə kompensasiya tələbləri ilə bağlı yazılı mövqelərini təqdim etmək üçün üç ay vaxt ayırıb.

Azərbaycan hökuməti ərizəçilərin mənəvi zərərə görə tələb etdiyi məbləğləri yüksək hesab edib və hər bir şəxsə 3 min avro ödənilməsini təklif edib. Məhkəmə bu təklifi qəbul edərək bütün şikayətçilər üçün mənəvi zərərə görə kompensasiyanı eyni məbləğdə müəyyənləşdirib.

Qərara əsasən, Başxanım Abbasova ilə yanaşı, Tahirə Salamovaya 47 min avro, Zaman Mahmudovun oğluna 127 min avro, Alla Fətəliyevaya 53 min 700 avro, Günel İsimxanovaya isə 44 min 300 avro maddi təzminat ödəniləcək. Digər ərizəçilər üzrə kompensasiya məbləğləri də nəzərə alınmaqla, ümumi ödəniş 751 min 250 avro təşkil edir.

“Qış parkı” layihəsi 2008-ci ildə Bakı şəhər İcra Hakimiyyətinin o zamankı başçısı Hacıbala Abutalıbovun sərəncamı ilə həyata keçirilməyə başlanıb. Paytaxtın “Beşmərtəbə” adlanan ərazisindən Heydər Əliyev Sarayının arxasına qədər uzanan sahədə parkın salınması üçün çoxsaylı yaşayış evləri və qeyri-yaşayış obyektləri sökülüb.

Söküntü zamanı mülkiyyətçilərə əmlaklarının hər kvadratmetri üçün 1500 manat kompensasiya təklif olunub. Bir sıra sakinlər təklif edilən məbləği qəbul etməyərək məhkəmələrə müraciət edib, sonradan işlərin bir hissəsini Avropa İnsan Hüquqları Məhkəməsinə çıxarıblar.

“Qış parkı” ilə bağlı AİHM-də baxılan işlər təkcə bu qərarla məhdudlaşmır. 2025-ci ilin yanvarında “Bağvanov və digərləri Azərbaycana qarşı” işi üzrə çıxarılan qərarda 18 ərizəçiyə ümumilikdə 1 milyon 693 min avro kompensasiya ödənilməsi müəyyən edilib.