Noyabrın 14-də Bakı Ağır Cinayətlər Məhkəməsində dələduzluqda ittiham olunan Daxili İşlər Nazirliyinin Hava Nəqliyyatında Polis İdarəsinin keçmiş rəis müavini, polkovnik Rasim İldırımzadə, “Bakutime.az” saytının təsisçisi Zaur Mirzəzadə və Qoşqar Məmmədovun məhkəməsinin hazırlıq iclası keçirilib. 

Hazırlıq iclası başlayan kimi təqsirləndirilən şəxslər və vəkilləri, eləcə də zərərçəkmiş şəxsin nümayəndəsi ittiham aktı ilə tanış olmadıqlarını bildiriblər. Hakim heyəti müşavirə keçirərək proses iştirakçılarının ittiham aktı ilə tanış olması üçün vaxt verilməsinə dair qərar qəbul edib. Beləliklə, hazırlıq iclası yarımçıq dayadırılıb və noyabrın 26-da davam edəcək. 

İttiham aktına görə, Rasim İldırımzadə, Zaur Mirzəzadə və Qoşqar Məmmədov əlbir olaraq iş adamı Qurban Piriyevə qarşı xüsusilə külli miqdarda dələduzluq etməkdə təqsirləndirilirlər. Onlara Cinayət Məcəlləsinin 178.4-cü (dələduzluq, xüsusilə külli miqdarda törədildikdə) maddəsi ilə ittiham verilib. 

Rütbəcə polkovnik olan Rasim İldırımdzadə Daxili İşlər Nazirliyinin Hava Nəqliyyatında Polis İdarəsinin keçmiş rəis müavinidir. Uzun illər Bakının Suraxanı, Xətai rayonlarının prokuroru olmuş Yusif İldırımzadənin qardaşıdır. Digər qardaşı isə bir neçə il əvvəl ləğv olunmuş  “Əmrah Bank”ın təsisçisi Yunus İldırımzadədir.  

Zaur Mirzəzadə Dünya Azərbaycanlıları İctimai Maarif Mərkəzinin, həmçinin  “bakutime.az” və “xalq.az” saytlarının rəhbəri olub. İki il əvvəl elə dələduzluq ittihamı ilə məhkum edilsə də, sonradan ona bəraət verilib. 

Qoşqar Məmmədovsa uzun illər Balakən rayonu dairə seçki komissiyasının katibi olub. 

Bir neçə il əvvəl Rasim İldırımzadə istintaqdan yayındığı üçün axtarışa verilib və həbs edilib. İstintaq dövründə vəkillərin vəsatəti əsasında həm onun, həm də digər iki nəfərin barəsində  “başqa yerə getməmək” haqda qətimkan tədbiri seçilib. 

Əvvəllər müxtəlif vəzifələrdə işləmiş, son vaxtlar iş adamı kimi fəaliyyət göstərən Qurban Piriyev istintaq orqanlarına ərizəsində göstərib ki, Balakən rayon sakini olan Hürü Əmiraslanovanın vasitəsiylə tanış olduğu bu şəxslər onu aldadaraq külli miqdarda pulunu mənimsəyib. Əslində Hürü Əmiraslanova da məsuliyyətə cəlb olunubmuş, ancaq istintaq dövründə vəfat edib. 

Qurban Piriyev istintaq orqanlarına müraciətində bildirib ki, təqsirləndirilən şəxslər onu Bakı şəhərinin rayonlarından birinə icra başçısı təyin olunacağı vədi ilə aldadıblar. Onun sözlərinə görə, cinayətin əsas təşkilatçısı olan Rasim İldırımzadə qrupun digər üzvü Qoşqar Məmmədovun Prezident Administrasiyasında yüksək vəzifədə çalışdığınna və onun məsələsini həll edəcəyini inandırıb. O, Zaur Mirzəzadəni isə Nihat adı ilə vəzifəli şəxs kimi təqdim edib.  

Qurban Piriyev icra başçısı keçmək üçün qrup üzvlərinə bir neçə dəfəyə 510 min manat pul və 34 min manatlıq qızıl-zinət əşyaları verdiyini deyir. Sonradan aldanıldığını bilən zərərçəkmiş polisə şikayət edib. İlkin istintaq dövründə ona dəymiş 544 min manat ziyanın 85 min manatı Rasim İldırımzadə, 20 min manatı isə Zaur Mirzəzadə və Qoşqar Məmmədov tərəfindən geri qaytarılıb. 

Təqsirləndirilən şəxslər heç biri özünü təqsirli bilmir.