Barələrində məhkəmə hökmü olan, "Abzas Media işi" üzrə həbsdə olan jurnalistlər hələ də Bakıdan 70 kilometr aralıda Umbakı qəsəbəsindəki təcridxanada saxlanılır. 

İyunun 20-də Bakı Ağır Cinayətlər Məhkəməsində barələrində hökm oxunan, Bakı İstintaq Təcridxanasında saxlanılan jurnalistlərin başqa təcridxanaya köçürülməsi ilə bağlı xüsusi qərar olmayıb.  Buna baxmayaraq, kişi jurnalistləri özlərinə və yaxınlarına öncədən məlumat vermədən iyunun 26-da Umbakı təcridxanasına köçürüblər.

Müdafiə tərəfi Penitensiar Xidmətin bu addımını qanunsuz sayıb. İyulun 3-də məhkəmə Abzas Media direktoru Ülvi Həsənlinin Bakı İstintaq Təcridxanasına qaytarılmaqla bağlı vəsatətini təmin etsə də, bu baş tutmayıb. 

Umbakı təcridxanası Bakı İstintaq Təcridxanasına nisbətən şəhərdən uzaqdır və ailələrlə görüşdə məhdudiyyətlərə səbəb olur. 

Sentyabrın 9-da Bakı Apellyasiya Məhkəməsi "Abzas"çılar barədə olan hökmü qüvvədə saxlayıb. Buna baxmayaraq, onlar hələ də cəzaçəkmə müəssisələrinə köçürülməyiblər. 

İş üzrə həbsdə olan Azadlıq Radiosunun jurnalisti və iqtisadçı Fərid Mehralızadə vurğulayıb ki, bu müəssisə şəhərə uzaq olduğundan gediş-gəliş həm ailələr, həm vəkillər üçün çətindir. Bununla yanaşı, canlı görüş imkanı yoxdur və ailə görüşləri yalnız şüşə arxasından mümkün olur. 

“Umbakı təcridxanasında haqqında hökm olan məhbusların əksəriyyəti hökm aldıqları həftənin şənbə günləri cəzaçəkmə müəssisələrinə köçürülür. 'Abzas Media işi' üzrə həbs edilənlərin barələrində isə Apelyasiya Məhkəməsinin yekun qərar çıxarmasına baxmayaraq, heç kim köçürülməyib", – o yaxınları vasitəsilə radioya bildirib. 

İyunun 20-də Bakı Ağır Cinayətlər Məhkəməsində baş tutan iclasda “Abzas Media işi” üzrə təqsirləndirilən şəxslərə hökm oxunub. 

Hakimin qərarı ilə Abzas Medianın direktoru Ülvi Həsənli, baş redaktor Sevinc Vaqifqızı, araşdırmaçı jurnalist Hafiz Babalı və Azadlıq Radiosunun jurnalisti, iqtisadçı Fərid Mehralızadə 9 il, jurnalistlər Nərgiz Absalamova və Elnarə Qasımova 8 il, Abzas Medianın koordinatoru Məhəmməd Kekalov isə 7 il 6 ay azadlıqdan məhrum edilib.

Onlar qaçaqmalçılıq da daxil olmaqla bir neçə maddədə ittiham ediliblər. Lakin jurnalistlər və müdafiəçiləri istintaqın ortaya tutarlı sübutlar qoymadığını bildirib.