“İkinci Qarabağ müharibəsindən sonra yaranmış situasiya Türkiyə-Ermənistan sərhədlərinin açılmasını mümkün edə bilər”.

Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədli “Toplum TV”-yə prezidentin bugünkü çıxışını şərh edərkən belə deyib.

Fevralın 26-da Prezidenti İlham Əliyev yerli və xarici jurnalistlər üçüm keçirdiyi mətbuat konfransında Türkiyənin artıq sərhədləri açacağına işarə edib.
Bu daha çox kimin maraqlarına uyğundur: Türkiyənin, yoxsa Ermənistanın? Azərbaycanın bundan qazancı və ya itkiləri nə ola bilər?

Anar Məmmədli deyir ki, sərhədlərin açılması bölgədə stabilliyin və sülhün qorunması üçün yeni əməkdaşlıq imkanları yarada, Ermənistanın çoxillik antitürk təbliğatının qarşısını ala bilər.

A.Məmmədli iqtisadi baxımdan bunun həm Ermənistana, həm də Türkiyəyə faydalı olacağını bildirir: “Türkiyə regionda iqtisadiyyatı ən güclü olan ölkələrdən biridir. Belə bir ölkənin Ermənistan bazarına giriş əldə etməsi onun özü üçün də əlverişlidir. Eyni zamanda, bu, Ermənistan iqtisadiyyatı üçün də faydalıdır”.

“Sərhədlərin açılması daha çox Ermənistan tərəfini qazanclı çıxarar”

Milli Məclisin deputatı Fəzail Ağamalı isə hesab edir ki, Ermənistanın daxilində baş verənlər bu ölkənin durumunu ağırlaşdırıb: "Ermənistan hazırda iki yol ayırıcındadır: ya revanşistlər qüvvələrə dəstək verib onların hakimiyyətə gəlməsinə yardım etməli, ya da qonşu dövlətlərlə normal münasibət saxlamalıdır". 

“Sərhədlərin açılması region dövlətlərinin hər biri üçün xeyirlidir. Çünki Ermənistan tərəfinin yaratdığı gərginlik heç bir tərəfə lazım deyil. Hətta onların özlərinə də” - deputat belə düşünür. 

Deputat deyir ki, bunun üçün birinci addımı Ermənistan atmalıdır: “Əslində, sərhədlərin açılması daha çox Ermənistan tərəfinin qazanclı çıxarar. Neçə illərdir ki, Azərbaycanla və Türkiyəylə blokada şəraitində yaşaması bu ölkəni ağır duruma salıb. Ermənistanda işsizlik, iqtisadiyyatın zəifləməsi həm də bununla bağlıdır. Bu gün Ermənistanın dövlət borcu ölkənin ümumi daxili məhsulu dəyərindədir. Bu baxımdan, Ermənistanda ağıllı, xalqın maraqlarına xidmət edən siyasətçilər ölkənin mənafeyinə uyğun yolu seçməlidirlər”.

O bu məsələdə o qədər ümidli olmadığını da dilə gətirib: “3 ölkə arasında yaranacaq əlaqələr, bəlkə də, Ermənistandakı militarizmi zamanla yox edər. Çünki bu millət körpəlikdən “türk düşməndir” təbliğatıyla böyüyür“.