Hüquq-mühafizə orqanları Ermənistanın "Çiçəklənən Ermənistan" Partiyasının sədri və iş adamı Qaqik Tsarukyanın evində axtarış aparır.

Partiyanın mətbuat katibi İveta Tonoyanın "Facebook" hesabında yaydığı məlumata görə, hüquq-mühafizə orqanlarının əməkdaşları vəkillərin evə daxil olmasına icazə verməyiblər.

İyunun sonunda Ermənistanın Baş Prokurorluğu Qaqik Tsarukyan barəsində cinayət işinin başlanmasına razılıq verilməsi üçün Mərkəzi Seçki Komissiyasına (MSK) müraciət edib. O, xüsusilə külli miqdarda vergidən yayınmaqda ittiham olunur.

MSK bildirib ki, Baş Prokurorluğun vəsatətinə Konstitusiya Məhkəməsi parlament seçkiləri ilə bağlı şikayətlərə baxdıqdan sonra baxacaq.

İveta Tonoyanın sözlərinə görə, Tsarukyana məxsus şirkətlərin ofislərində də axtarışlar aparılır. O bildirib ki, "Multi Group" holdinqinə daxil olan demək olar ki, bütün şirkətlərdə, eləcə də həmin müəssisələrin direktorlarının yaşadıqları ünvanlarda genişmiqyaslı axtarışlara başlanılıb.

Hələ seçki kampaniyası dövründə baş nazir Nikol Paşinyan Tsarukyanın ailəsinə məxsus "Ararat" sement zavodunu milliləşdirmək niyyətini açıqlamışdı. Paşinyan bu müəssisəni rəqibinin "biznesinin təməli", Tsarukyan və yaxınlarını isə "mafiya" adlandırmışdı. "Çiçəklənən Ermənistan"ın lideri isə cavab olaraq bu addımların onu qorxutmayacağını bəyan etmişdi.

Paşinyan həmçinin bildirmişdi ki, zavoda müvəqqəti idarəçinin təyin olunması məsələsi milyarder Samvel Karapetyana məxsus "Ermənistan Elektrik Şəbəkələri" şirkətində olduğu kimi çox qısa müddətdə həll ediləcək. 

Ermənistan MSK-nın açıqladığı nəticələrə əsasən, parlament seçkilərində Paşinyanın "Vətəndaş Müqaviləsi" partiyası 49,745 faiz, Samvel Karapetyanın "Güclü Ermənistan" bloku 23,271 faiz, sabiq prezident Robert Koçaryanın "Ermənistan" alyansı isə 9,923 faiz səs toplayıb. "Çiçəklənən Ermənistan" partiyası isə 3,989 faiz səs topladığı üçün parlamentdə təmsil olunmaq hüququ qazanmayıb.

Ermənistanda bu hadisələr Konstitusiya Məhkəməsinin iyunun 7-də keçirilən parlament seçkilərinin nəticələrini qüvvədə saxlaması və MSK-nın yekun qərarını qanuni hesab etməsi fonunda baş verir. 

Məhkəmə müxalif qüvvələrin, o cümlədən "Güclü Ermənistan", "Ermənistan" blokları və "Çiçəklənən Ermənistan" partiyasının şikayətlərini təmin etməyib. Müxalifət seçkilərdə saxtakarlıq və siyasi təzyiq iddialarını davam etdirsə də, hökumət bu ittihamları rədd edir.