Həbsdə olan və 15 gündür aclıq aksiyası keçirən müxalif siyasətçi Tofiq Yaqublunun səhhətinin pisləşdiyi bildirilir.

Bu barədə onun qızı Nigar Həzi sosial media hesabında vəkil Nemət Kərimliyə istinadən məlumat verib.

Martın 10-da saxlandığı Bakı İstintaq Təcridxanasında T.Yaqublu ilə görüşən N.Kərimli bildirib ki, həkimlərin müayinəsindən sonra siyasətçinin 10 kiloqram çəki itirdiyi, qan təzyiqinin isə aşağı - 60/90 olduğu məlum olub.

Vəkil də T.Yaqublunun xeyli çəki itirdiyini, habelə səsinin zəiflədiyini və rənginin tutqunlaşdığını təsdiqləyib.

T.Yaqublu fevralın 23-də saxlanıldığı Bakı İstintaq Təcridxanasında 1 həftəlik cərimə kamerasına ("karser") salınıb və həmin vaxtdan aclıq edir. Müəssisə rəhbərliyi isə qərarı onun "kamerada axtarışa mane olması ilə" əsaslandırmışdı.

T.Yaqublu daha öncə vəkili vasitəsilə verdiyi açıqlamada aclığa başlamasını "əsassız yerə karsa salınmasından" əlavə, barəsindəki "qanunsuz məhkəmə hökmü və ABŞ-nin Azərbaycandakı səfirliyinin insan haqlarının kobud şəkildə pozulmasına açıq göz yumması" ilə izah edib.

Milli Şuranın və Müsavat Partiyasının üzvü olan Tofiq Yaqublu ötən il martın 10-da Bakı Ağır Cinayətlər Məhkəməsinin hökmü ilə 9 il azadlıqdan məhrum edilib.

O, Cinayət Məcəlləsinin külli miqdarda ziyan vurmaqla dələduzluq və saxta sənəd hazırlama və ya istifadə etmə maddələri ilə təqsirli bilinib.

Özü isə ittihamları qurama sayır.

T.Yaqublu hökmə etiraz olaraq aprelin 1-dən mayın 10-a qədər aclıq edib.

O, 2013-cü ildə də İsmayıllıda etirazlarda iştirak etdiyinə görə Cinayət Məcəlləsinin 233-cü (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) və 315-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddələri üzrə həbs edilib. Şəki Ağır Cinayətlər Məhkəməsinin qərarı ilə 5 il müddətinə azadlıqdan məhrum edilib.

Beynəlxalq ictimaiyyət, ABŞ və Avropa İttifaqı tərəfindən onun həbsi pislənilib. T.Yaqublu 2016-cı ilin martında əfv sərəncamı ilə azadlığa buraxılıb.