Həbsdə olan işçi hüquqları fəalı Afiəddin Məmmədov ictimaiyyətə məktub ünvanlayıb.

Yaxınları tərəfindən ictimailəşdirilən məktubda A.Məmmədov saxlanıldığı 2 saylı Cəzaçəkmə Müəssisəsində məhkumların bir sıra hüquqlarının məhdudlaşdırıldığını iddia edir.

Onun sözlərinə görə, daha əvvəl saxlanıldığı Bakı İstintaq Təcridxanası və Umbakı Penitensiar Kompleksindən fərqli olaraq, 2 saylı müəssisədə məhkumlara həftədə bir dəfə görüntülü zəng imkanı verilmir.

“Məhkumlar bildirir ki, əvvəllər görüntülü danışıq hüququ ödənişli əsaslarla, yəni dəqiqəsi 1 manat olmaqla təmin olunurdu, lakin bir neçə məhkumun danışıq zamanı qeyri-etik ifadələrinə görə ləğv edilib. İndi 2 saylı Cəzaçəkmə Müəssisəsində olan 1800-ə yaxın məhkum həsrətlə bu hüququn yenidən bərpasını gözləyir. Onların çoxu məsafəyə görə ailə üzvlərinin üzlərinə aylarla həsrət qalır. Məhkumlar da yer üzünün sakinləridir. Onlar cəmiyyətdən təcrid olunaraq yetərincə cəzalandırılıblar. Bu insanların arasında xarici vətəndaşlar da var. 21-ci əsrə aid Penitensiar Xidmət müəssisələrində ən azından xırda texnoloji inkişafların qarşısı alınmamalıdır”, - o qeyd edib.

Fəal həmçinin məhkumların cəzalarının qalan hissəsinin ləğvi ilə bağlı məhkəmələrdə rüşvət tələblərinin olduğunu iddia edir.

“Misal üçün, Xəzər Rayon Məhkəməsi cəzanın çəkilməyən hər ayı üçün 500 AZN pul tələb edir. Təbii ki, şərti də var. Cəzanın çəkilməyən hissəsi iki ildən az olmalıdır. Qısaca, azadlıq cibinizdəki pulun miqdarına görə müəyyənləşdirilir. Əgər ödəyəcək pulunuz yoxdursa, müsbət rəy almağınız əhəmiyyətsizdir”, - o yazıb.

A.Məmmədov məktubunda müəssisədəki sıxlıq və şəraitlə bağlı narazılığını da ifadə edib.

“Azərbaycandakı məhkumların böyük əksəriyyəti sosial-iqtisadi problemlərinə görə cinayət işləmiş şəxslərdir. Hökumət çıxış yolunu yeni həbsxanalar tikməkdə yox, yeni iş yerləri açmaqda axtarmalıdır. Saxlanıldığım 2 saylı Cəzaçəkmə Müəssisəsinin tutumu 800 məhkum olsa da, 1800-ə yaxın məhkum saxlanılır. Bir qism məhkum yerdə yatır, şərait isə bərbaddır. Penitensiar Xidmətin işçi heyəti əksik olduğu üçün məhkumlara tam nəzarət edə bilmir”, - o vurğulayıb.

Onun sözlərinə görə, son günlərdə cəzasının 2/3-ni çəkmiş məhkumlar Penitensiar Xidmət tərəfindən məhkəməyə müraciət etməyə həvəsləndirilir.

“Adi halda iki ili qalana qədər gözləyən məhkumlar azadlıq ümidilə məhkəməyə müraciət edir. İndi onların sayı yüzlərlədir. Bu hadisəyə kənardan nəzər yetirdiyimdə mənə Ədliyyə Nazirliyi ilə məhkəmə arasında münaqişə görünür. Sanki Ədliyyə Nazirliyi məhkumları müraciətə təşviq edərək vəziyyətə öz etirazını bildirir. Məhkəmələr Penitensiar Xidmətdə olduğu zaman məhkum sayını nizamlaya və korrupsiya yolu ilə gəlir əldə edirdilərsə, indi tamamilə kənarda qalıb gündən günə artan məhkum və onların saysız problemləri ilə qarşı-qarşıyadırlar. Bu gün həm Ədliyyə Nazirliyi, həm də məhkumlar böyük amnistiya gözləntisindədir. Ədalətli dövlətlərdə bu tez-tez baş verir. Azərbaycan hökuməti xalqının məhkum nümayəndələrini diqqətdən kənar qoymamalıdır”, - o əlavə edib.

Afiəddin Məmmədov 2023-cü il sentyabrın 20-dən həbsdədir.

O, Cinayət Məcəlləsinin xuliqanlıq niyyətilə qəsdən bədənə ağır xəsarət yetirmə və silah qismində əşyadan istifadə etməklə xuliqanlıq maddələri ilə ittiham olunur.

A.Məmmədov ilk dəfə 2023-cü ildə kuryerlərin mopedlərinin kütləvi şəkildə cərimə meydançasına aparılması ilə bağlı keçirilən etiraz aksiyası zamanı saxlanılmış və 30 sutka inzibati həbs almışdı.

Bu il yanvarın 14-də Bakı Ağır Cinayətlər Məhkəməsinin hökmü ilə o, 8 il müddətinə azadlıqdan məhrum edilib.

2022-ci ildə yaradılan “İşçi Masası” Həmkarlar İttifaqları Konfederasiyasının sədr və üzvləri Afiəddin Məmmədov, Ayxan İsrafilov, Elvin Mustafayev və Möhyəddin Orucov hazırda həbsdədirlər. Onlar müxtəlif ittihamlarla üzləşsələr də, bu ittihamları qurama və siyasi hesab edirlər.