Qurum həmçinin Azərbaycanın təqibləri dayandırmasını və siyasi motivli ittihamlarla tutulanları azad edilməsini istəyir

Avropa Şurası Parlament Assambleyasının qış sessiyasında üzv dövlətlərin vəziyyətilə bağlı müzakirələr aparılıb (Turan). 

Müzakirələrin yekunu olaraq qəbul edilən qətnamədə Azərbaycan və Gürcüstan da daxil olmaqla, bəzi ölkələrdə demokratiyadan geri çəkilmə və insan hüquqlarının pozulması ilə bağlı narahatlıq ifadə olunub.

AŞPA bildirir ki, Azərbaycanda demokratiyanın, qanunun aliliyinin və insan hüquqlarının getdikcə pisləşməsindən, xüsusilə də siyasi və vətəndaş fəallarına, KİV nümayəndələrinə və hökumətin digər tənqidçilərinə qarşı davamlı repressiyalardan ciddi narahatdır.

Qətnamədə hakimiyyət təqibləri dayandırmağa və siyasi motivli ittihamlarla tutulanların hamısını dərhal azad etməyə çağrılır.

Bundan başqa, siyasi partiyalar, media və qeyri-hökumət təşkilatları haqqında son illər qəbul edilən qanunların dəyişdirilməsinə çağırış var.

AŞPA həmçinin rəsmi Bakının Avropa Şurasının İşgəncələrə Qarşı Komitəsi ilə əməkdaşlıqdan imtinasını, eləcə də qurumun 2024-cü il növbədənkənar prezident və parlament seçkilərini müşahidə etməyə dəvət olunmamasını pisləyir.

Beynəlxalq müşahidəçilərə istinadla həmin seçkilərin demokratik, beynəlxalq seçki standartlarına cavab vermədiyi, ifadə, toplaşma azadlığına məhdudiyyətlərin artması şəraitində keçirildiyi vurğulanır.

Qətnamədə eyni zamanda, ötən il avqustun 26-da Azərbaycan Xarici İşlər Nazirliyinin AŞPA-nın Azərbaycan nümayəndə heyətinin səlahiyyətlərinin dayandırılmasına səs verən 76 üzvünü persona non grata elan etməsi pislənilməklə yanaşı qəbuledilməz sayılır. 

Qurum rəsmi Bakınə bu qadağanı dərhal ləğv etməyə və həll olunmamış bütün məsələlərlə bağlı Avropa Şurası orqanları ilə konstruktiv dialoqa başlamağa çağırıb.

Həmçinin qeyd olunur ki, AŞPA saxlanılan Qarabağ separatçılarının və həbs edilmiş digər ermənilərin vəziyyətini izləməyə davam edir, onları azad etməklə bağlı Azərbaycana çağırışını təkrarlayır.

AŞPA ötən ilin qış sessiyasında Azərbaycan nümayəndə heyətinin səsvermə hüququnu dondurub. Bunu ölkənin qurum qarşısında insan hüquq və azadlıqları ilə bağlı götürdüyü ğhdəlikləri yerinə yetirməməsi ilə əsaslandırıb. 

Azərbaycan hakimiyyəti, eləcə də Prezdent İlham Əliyev bu tənqidlərlə razılaşmır.