Birləşmiş Millətlər Təşkilatının (BMT) İnsan Hüquqları Şurasının məruzəçisi Cina Romero Seçkilərin Monitorinqi və Demokratiyanın Tədrisi Mərkəzinin (SMDT) həbsdə olan sədri Anar Məmmədlinin işi ilə bağlı Azərbaycanın baş prokuroru Kamran Əliyevə məktub göndərdiyini bildirib.

Romero "X" səhifəsində yazıb ki, məktubu oktyabrın 23-də göndərib. 

Onun sözlərinə görə, məktubda A.Məmmədliyə qarşı davam edən cinayət işi və “olduqca ağır” ittihamlarla bağlı narahatlığını ifadə edib. 

Məruzəçi paylaşımında qeyd edib ki, o, A.Məmmədlinin ədalətli məhkəmə araşdırması hüququnun pozulmasından və onun lazımi tibbi yardım alma imkanının məhdudlaşdırılmasından “xeyli narahatdır”. 

"Hər şey onu göstərir ki, məqsəd onun seçki monitorinqi və insan hüquqları fəaliyyəti səbəbilə cəzalandırılması və susdurulmasıdır”, - Romero əlavə edib. 

O, həmçinin, qeyd edib ki, A.Məmmədliyə qarşı hazırki və 2013-cü ildəki cinayət işləri arasında “gözə çarpan oxşarlıq” var. Məruzəçi xatırladıb ki, o vaxtkı iş üzrə Avropa İnsan Hüquqları Məhkəməsi (AİHM) hüquq pozuntuları müəyyən edib.

Romero məktubunda baş prokuroru Azərbaycanın Mülki və Siyasi Hüquqlar haqqında Beynəlxalq Pakt (ICCPR) çərçivəsində hüquqi öhdəliklərinə “tam əməl etməyə” çağırdığını bildirib. Məruzəçi yazıb ki, A.Məmmədli legitim insan hüquqları və seçki monitorinqi fəaliyyətinə görə “qisas məqsədilə” cəzalandırılmamalıdır. 

"Baş prokuroru Anar Məmmədlinin istintaq təcridxanasından təcili şəkildə azad edilməsini, dərhal tibbi müalicəyə çıxışının təmin olunmasını, vətəndaş cəmiyyəti fəaliyyəti ilə bağlı bütün cinayət ittihamlarının geri götürülməsini, eləcə də səmərəli hüquqi müdafiə və kompensasiyanın təmin edilməsini tələb etməyə çağırdım”, - o əlavə edib. 

Baş Prokurorluq müraciətlə bağlı açıqlama verməyib. 

Anar Məmmədli 2024-cü il aprelin 29-da saxlanılıb. O, Cinayət Məcəlləsinin qabaqcadan əlbir olan bir qrup şəxs tərəfindən qaçaqmalçılıq maddəsi ilə ittiham olunur. 

QHT rəhbəri özünü təqsirli saymır. Beynəlxalq insan haqları təşkilatları onu siyasi məhbus hesab edirlər.