Böyük Britaniya, Kanada və Avstraliya sentyabrın 21-də Fələstini rəsmi olaraq dövlət kimi tanıyıblar.  

Daha bir neçə Avropa ölkəsinin də bu həftə eyni addımı atmağa hazırlaşdığı bildirilir. 

“Bu gün fələstinlilər və israillilər üçün sülh ümidini dirçəltmək və iki dövlətli həll yolunu təmin etmək məqsədilə Birləşmiş Krallıq rəsmi olaraq Fələstin Dövlətini tanıyır,” – deyə Böyük Britaniyanın baş naziri Kir Starmer  bəyanatında bildirib.

Kanada baş naziri Mark Karni bəyanatında İsrail hökumətinin Fələstin dövlətinin yaradılması perspektivini "əbədi olaraq aradan qaldırmaq üçün planlı şəkildə fəaliyyət göstərdiyini" deyib. 

"İsrail beynəlxalq hüquqa zidd olaraq İordaniya çayının qərb sahilində məskunlaşmaların genişləndirilməsi siyasətini amansızcasına davam etdirib. Qəzzada apardığı davamlı hücum nəticəsində on minlərlə mülki şəxs həlak olub, bir milyondan çox insan məcburi köçkünə çevrilib və beynəlxalq hüququn pozulması hesab olunan dəhşətli, qarşısı alına biləcək aclıq baş verib", - o əlavə edib. 

Avstraliyanın baş naziri Antoni Albaniz isə ölkəsinin Fələstini tanımasının "iki dövlətli həll yoluna yeni təkan vermək məqsədilə əlaqələndirilmiş beynəlxalq səylərin bir hissəsi" olduğunu qeyd edib. "Bu səylər Qəzzada atəşkəsin əldə olunması və 7 oktyabr 2023-cü il faciəsində girov götürülənlərin azad olunması ilə başlayır", - o vurğulayıb. 

İsrailin baş naziri Benyamin Netanyahu  bəyanatında bu ölkələri sərt tənqid edib, onları Qəzza zolağına nəzarət edən HƏMAS qruplaşmasını mükafatlandırmaqda günahlandırıb. 

“BMT-də və digər bütün arenalarda bizə qarşı yönəlmiş yalançı təbliğata və varlığımızı təhlükəyə atacaq, terrorizmə absurd bir mükafat olacaq Fələstin dövlətinin yaradılması çağırışlarına qarşı mübarizə aparmalı olacağıq. Beynəlxalq icma bu məsələ ilə bağlı gələn günlərdə bizdən xəbər alacaq", - o bildirib. 

HƏMAS isə qərarları alqışlayaraq bunu “Fələstin xalqının azadlıq və geri dönüş yolunda apardığı mübarizənin, möhkəmliyinin və qurbanlarının haqlı nəticəsi” adlandırıb.

Əsasən simvolik xarakter daşıyan bu addım fələstinlilərə diplomatik əlaqələrini artırmaq və ölkələrlə müqavilələr bağlamaq imkanını təmin edir.

Hazırda BMT-nin 193 üzvündən 140-dən çoxu Fələstini tanıyır. 

Sentyabrın 22-də başlayacaq BMT Baş Assambleyasında Fransa, Portuqaliya, Belçika, Lüksemburq və Yeni Zelandiyanın da eyni addımı atacağı gözlənilir.