Həbsdə olan araşdırmaçı jurnalist Hafiz Babalı ədliyyə naziri Fərid Əhmədov və İnsan Hüquqları üzrə Müvəkkil (Ombudsman) Səbinə Əliyevaya müraciət edib. 

Noyabrın 23-də jurnalistin "Facebook" səhifəsində ictimailəşdirilən məktubda H.Babalının məhkəmələrə yazdığı ərizələrin çatdırılmadığı xəbər verilib. 

Məktubda xatırladılıb ki, H.Babalı haqqında yayımlanan məqalə və reportajlara görə bəzi hökumətyönlü media orqanlarını məhkəməyə verməyə çalışır, lakin saxlanıldığı 2 saylı Cəzaçəkmə Müəssisəsinin rəhbərliyi ərizələrin poçtla çatdırılmasında maneə törədir. 

"Hökumətyönümlü Kütləvi İnformasiya Vasitələri (KİV), o cümlədən bəzi televiziya kanallarında Hafiz Babalının əleyhinə qarayaxma kampaniyası aparılır. Bununla əlaqədar o, şərəf və ləyaqətinin, işgüzar nüfuzunun müdafiəsi məqsədilə mülki iddialarla yanaşı, böhtana yol vermiş media orqanlarının vəzifəli şəxslərinin cinayət məsuliyyətinə cəlb olunması üçün xüsusi ittihamçı kimi də yerli məhkəmələrə müraciət etmək hüququndan istifadə edir. Lakin noyabr ayının 6-dan etibarən şikayət ərizələri ona məlum olmayan səbəblərdən 2 saylı Cəzaçəkmə Müəssisəsinin rəhbərliyi tərəfindən aidiyyatı üzrə məhkəmələrə poçt vasitəsilə göndərilmir. Müəssisə müdiriyyəti onun hüquqlarını kobud surətdə məhdudlaşdıran bu hərəkətsizliyini heç bir qanuni əsasla izah edə bilmir", - müraciətdə bildirilib. 

"Hafiz Babalı onu qanunsuz maliyyələşdirilmə və sifarişli məqalələr yazmaqda, qaçaq yollarla xaricdən valyuta gətirmək, əks dövlət fəaliyyəti ilə məşğul olmaq kimi ağır cinayət əməllərini törətməkdə ittiham etməklə ona böhtan atan media subyektlərinin vəzifəli şəxslərinin bu ittihamları hakim qarşısında sübut etməyini, əks halda onların layiq olduqları cinayət məsuliyyətinə cəlb olunmasını tələb edir. Elə isə Penitensiar Xidmət Femidaya niyə mane olur?", - deyə sual olunub. 

Müraciətdə həm də qeyd olunub ki, H.Babalı yazdığı ərizələrin özünə qaytarılması üçün noyabrın 21-də cəzaçəkmə müəssisəsinin rəhbərliyinə müraciət edib. 

Hafiz Babalı daha əvvəlki ictimai müraciətində "Qafqazinfo" və "Baku TV" media qurumlarına qarşı məhkəmə iddialarının davam etdiyini xəbər vermişdi. 

Onun sözlərinə görə, iki ilə yaxındır sözügedən media orqanlarını haqqında böhtan xarakterli yazılar yazmağa görə məhkəməyə versə də, yerli məhkəmələr hələ də onun şikayətini təmin etmir. 

Jurnalist xəbər verib ki, bu yaxınlarda “Qafqazinfo"ya qarşı Nərimanov Rayon Məhkəməsinin qərarından apellyasiya şikayəti və “Baku TV"-yə qarşı Nəsimi Rayon Məhkəməsinə təqdim etdiyi iddia ərizəsi təmin edilməyib. O, şərəf və ləyaqətin, işgüzar nüfuzun müdafiəsinə dair iddia qaldırıb və özündən üzr istənilməsi, təkzib verilməsi və mənəvi zərərə görə kompensasiya ödənilməsini tələb edib. 

H.Babalı iddiaları Avropa İnsan Hüquqları Məhkəməsinə qədər qaldırmaqda israrlı olduğunu bildirib. O əlavə edib ki, sözügedən media qurumlarının rəhbər şəxslərini də məhkəməyə verməyə qərar verib. 

Hafiz Babalı 2023-cü ilin dekabrında "Abzas Media işi" çərçivəsində həbs olunub. 

İyunun 20-də Bakı Ağır Cinayətlər Məhkəməsində baş tutan iclasda “Abzas Media işi” üzrə təqsirləndirilən şəxslərə hökm oxunub. 

Hakimin qərarı ilə “Abzas Media”nın direktoru Ülvi Həsənli, baş redaktor Sevinc Vaqifqızı, araşdırmaçı jurnalist Hafiz Babalı, "Azadlıq Radiosu"nun jurnalisti Fərid Mehralızadə 9 il, jurnalistlər Nərgiz Absalamova və Elnarə Qasımova 8 il, “Abzas Media”nın koordinatoru Məhəmməd Kekalov isə 7 il 6 ay azadlıqdan məhrum edilib.

Onlar qaçaqmalçılıq da daxil olmaqla bir neçə maddədə ittiham ediliblər. Lakin jurnalistlər ittihamları rədd edib və məhz peşə fəaliyyətlərinə görə həbs olunduqlarını bildiriblər.