Gürcüstanda həbsdə olan keçmiş prezident Mixail Saakaşvili əsasən azərbaycanlıların yaşadığı Marneuli rayonunda bir qrup şəxsin İrana dəstək aksiyası keçirməsinə münasibət bildirib. 

Saakaşvilinin “Facebook” səhifəsində ictimailəşdirilən mesajda o, bunu Gürcüstanın “mövcudluğuna təhdid” adlandırıb. 

“Necə oldu ki, azərbaycanlı əhalimizin xeyli hissəsi İranın adamyeyən rejiminin tərəfdarına çevrildi? Necə oldu ki, Marneulidə gənclər [İranın keçmiş ali lideri Seyid Əli] Xameneinin portreti ilə gəzirlər? Yaxud necə oldu ki, bizim azərbaycanlılar İranın terrorçu xüsusi xidmət orqanları tərəfindən bu qədər asanlıqla ələ alındılar? Necə o həddə çatdıq ki, Azərbaycan məhz buna görə öz ərazisinə bizim azərbaycanlı həmvətənlərimizi buraxmamaq üçün Gürcüstanla sərhədi bağlamağa məcbur oldu? Fikir verin – Azərbaycan azərbaycanlıları buraxmır”, - o qeyd edib. 

Saakaşvili daha sonra prezidentliyindən əvvəlki dövrdə azərbaycanlıların Gürcüstanda “təcrid olunmuş şəkildə” yaşadığını, hakimiyyətə gəldikdən sonra isə onların Gürcüstan cəmiyyətinə inteqrasiyası üçün siyasət yürüdüldüyünü yazıb. 

“Bundan sonra əvvəllər yalnız Azərbaycana oxumağa gedən azərbaycanlı gənclər Gürcüstanda qalmağa başladılar. Bundan əlavə, biz azərbaycanlıların dövlət qurumlarında irəli çəkilməsinə başladıq. Bu kifayət idi? Yəqin ki, yox. Amma ümumilikdə doğru istiqamətdə hərəkət etməyə başlamışdıq. Bəs “koçların” [hakimiyyətdə olan “Gürcü Arzusu” partiyasına qarşı işlədilən təhqiramiz söz - red.] hakimiyyəti dövründə nə baş verdi? Korrupsiya və açıq reketçilik geri qayıtdı. Ən əsası isə İrandan gələn islamçılar və İranın kəşfiyyat xidmətləri gücləndi”, - deyə o iddia edib. 

Keçmiş prezident bu ayın əvvəlində Yunanıstan polisinin Gürcüstan vətəndaşı olan azərbaycanlını İrana işləmək şübhəsi ilə həbs etdiyini xatırladıb. 

“Gürcüstan hakimiyyəti gənclər üçün gələcək adına heç nə təklif etmir. Gürcülər buna etirazla və ya xaricə köçməklə cavab verirlərsə, azərbaycanlılar təsəllini İranın radikal şiəliyində tapırlar. Nəticə son dərəcə acınacaqlıdır. Biz çox təhlükəli etnik münaqişəyə yaxınlaşırıq. Rusiyanın bizə zorla qəbul etdirdiyi dövlətin dağıdılmasının nəticəsi budur”, - o əlavə edib. 

Azərbaycan prezidenti İlham Əliyev də əvvəllər çıxışlarında ölkənin quru sərhədlərinin milli təhlükəsizlik səbəbi ilə bağlı saxlanıldığını deyib, lakin konkret hansı təhlükənin olmasını açıqlamayıb. 

2012-ci ildən hakimiyyətdə olan "Gürcü Arzusu" partiyasının dövründə Saakaşviliyə qarşı ümumilikdə altı cinayət işi açılıb. Ona qarşı ittihamlar arasında səlahiyyətdən sui-istifadə və dövlət vəsaitlərini mənimsəmə var. 

Ölkədə olmadığı müddətdə barəsində qiyabi hökmlər çıxarılan Saakaşvili 2021-ci ilin oktyabrında Gürcüstana gizli qayıdışından sonra saxlanılıb.