“Rusiya-1” telekanalının aparıcısı və Kremlin təbliğatçısı Vladimir Solovyov Azərbaycana qarşı müharibə aparılması ehtimalından danışıb. 

Verilişində çıxış edən Solovyov Xəzər dənizində NATO bazasının yaradılmasının qarşısını almaq üçün yeni bir “xüsusi hərbi əməliyyat”ın zəruri ola biləcəyini iddia edib. Rusiya bu ifadəni artıq dörd ilə yaxın davam edən Ukrayna işğalını təsvir etmək üçün istifadə edir.

“Anlamaq lazımdır ki, Cənubi Qafqazda baş verənlər çox böyük problemdir. Yaxın zamanda Xəzər dənizi elə bir vəziyyətə düşə bilər ki, orada NATO bazaları yaransın. Bu isə o qədər təhlükəlidir ki, geosiyasi baxımdan elə nəticələrə gətirib çıxara bilər ki, [Ukrayna müharibəsi] bizim nəslimizin sonuncu xüsusi hərbi əməliyyatı olmaya bilər”, – Solovyov deyib.

Bu üstüörtülü təhdid Ermənistanın baş naziri Nikol Paşinyan, Azərbaycan prezidenti İlham Əliyev və ABŞ prezidenti Donald Trampın Vaşinqtonda görüşməsindən bir neçə gün sonra səsləndirilib. Həmin görüşdə liderlər Azərbaycan ərazisindən Ermənistan vasitəsilə Naxçıvan anklavına ABŞ tərəfindən idarə olunacaq marşrutun açılması barədə razılığa gəliblər. 

Bu razılaşma uzun müddət regionda əsas oyunçu olmuş Rusiyanı faktiki olaraq kənarda qoymağa hesablanıb və Kremlin üstüörtülü narazılığına səbəb olub. 

Rusiya Xarici İşlər Nazirliyinin sözçüsü Mariya Zaxarova Vaşinqton görüşü ilə bağlı şərhində xatırladıb ki, Ermənistanın İranla sərhədi hələ də Rusiya sərhədçiləri tərəfindən qorunur. 

“Vaşinqtonun regional kommunikasiya xətlərinin bərpasına dair açıqlamalarını diqqətlə qiymətləndirəcəyik. Rusiya ilə əldə olunmuş üçtərəfli razılaşmalar qüvvədə qalır, çünki tərəflərdən heç biri onlardan rəsmi olaraq geri çəkilməyib. Ermənistanın Avrasiya İqtisadi İttifaqının vahid gömrük məkanında iştirakını, xüsusilə də respublika ərazisindən keçən tranzit əməliyyatlarının tənzimlənməsi baxımından, nəzərə almaq vacibdir”, - o qeyd edib. 

Rusiyalı deputat Andrey Qurulyov isə Azərbaycan mallarının idxalına qadağa qoymağı və Rusiyadakı azərbaycanlılara qarşı təzyiq tədbirləri həyata keçirməyi təklif edib. O, həmçinin, bildirib ki, “xüsusi hərbi əməliyyat geniş anlayışdır” və bu, Rusiyanın sərhədində yerləşən bütün ölkələri əhatə edə bilər. 

3 milyondan çox “Telegram” izləyicisi olan, Kremlə yaxınlığı ilə  tanınan hərbi bloger Yuri Podolyaka isə Rusiya ilə Azərbaycan arasında müharibənin “nəzəriyyədən real ehtimala doğru irəlilədiyini” deyib. 

O, son günlər yayılan, Bakının Ukraynanın enerji anbarlarında saxlanılan Azərbaycan yanacaq ehtiyatlarına Rusiya hücumlarını dayandırmadığı təqdirdə Kiyevə silah tədarükünə başlaya biləcəyi barədə şayiələrə istinad edib.