Dekabrın 2-də siyasi fəal və I qrup əlil Famil Xəlilovun həyat yoldaşı, anası və övladları onu quru aclıq aksiyasından imtina etməsi üçün Ədliyyə Nazirliyinin Baş Tibb İdarəsinin müalicə müəssisəsində ziyarət ediblər. 

Bu haqda Turan-a onun həyat yoldaşı Kiçikxanım Xəlilova danışıb.  

Xəbərdə deyilir ki,  Xəlilovun aclığı dayandırması üçün söhbətə təcridxana rəisi də qoşulub. Amma o azadlığa çıxana və ya ev dustaqlığına  buraxılana qədər yeməkdən, içməkdən və dərmanlardan imtina edəcəyini bildirib.

Kiçikxanım Xəlilova ərinin səhhətinin kəskin pisləşdiyini bildirib: “Famil artıq müstəqil şəkildə yeriyə bilmir; onu görüşə əlil arabasında gətirdilər. Çox arıqlayıb, dərisi və sümükləri qalıb. Dodaqları qaralıb. Onun dekabrın 12-nə təyin edilmiş növbəti məhkəmə iclasına qədər yaşaması çətin görünür. Nə edəcəyimizi bilmirik—Famil günahsız olduğu halda həbsdə qalmaqdan ölümə üstünlük verib”.

Noyabrın 28-də məhkəmə F.Xəlilovun haqqındakı həbs qətimkan tədbirinin ev dustaqlığı ilə əvəzlənməsi ilə bağlı  vəsatəti təmin etməyib. Bundan sonra onun quru aclığa başladığı deyilir.

Yaxınları bildirirlər ki, Xəlilov Penitensiar Xidmət Bakıda keçirilən COP-29 konfransı zamanı onun ev dustaqlığına buraxılacağını vəd etdiyi üçün 15 avqustda başladığı aclıq aksiyasını dayandırıb. Amma 28 noyabrda Bakı Ağır Cinayətlər Məhkəməsi vəsatəti rədd edərək onu təcridxanada saxlayıb.

Fazil Qasımovun hüquqlarının müdafiəsi məsələsi Ombudsmanın diqqətindədir və onun hüquqlarının müdafiəsi istiqamətində müvafiq tədbirlər görülməkdədir, Ombudsman Aparatının hüquq müdafiəçisi Rüfət Səfərova cavab məktubunda belə deyilir.

Məktubda həmçinin Ombudsman Aparatının Baş Prokurorluğa, Ədliyyə Nazirliyinin Penitensiar Xidmətinə və Penitensiar Xidmətin Baş Tibb İdarəsinə müvafiq sorğular göndərdiyi qeyd edilir.

“Bu günlərdə F. Qasımovla bağlı yayılmış məlumatlar əsasında yenidən araşdırma aparılmış, hüquqlarının təmin edilməsi ilə bağlı Ombudsman tərəfindən operativ tədbirlər görülmüşdür,” məktubda qeyd edilir.

Bununla belə, məktubda Qasımovun aclıq aksiyası barədə heç nə qeyd olunmayıb.