Həbsdə olan tədqiqatçı və sülh fəalı Bəhruz Səmədovun daha bir ay cərimə kamerasında ("karser") saxlanılacağı bildirilir. 

Bu barədə ictimai fəal Əmrah Təhməzov "Toplum TV"-yə B.Səmədovun nənəsi Zibeydə Osmanovaya istinadən məlumat verib.

Oktyabrın 26-da Z.Osmanova nəvəsilə saxlanıldığı 11 saylı Cəzaçəkmə Müəssisəsində görüşüb. B.Səmədov oktyabrın 25-də "karser"dən buraxılmalı olsa da, o, nənəsinə müəssisə rəhbərliyi tərəfindən "karser"də saxlanılma müddətinin daha 1 ay uzadıldığını deyib. 

"Mənim günahım nədir ki, hələ məni bir ay da burda saxlamaq istəyirlər? Niyə mənim məhkəmələrimi qapalı keçirirlər, açıq eləmirlər? Deyirlər dövlətə xəyanət etmisən. İzah etsinlər görək, mən dövlətin hansı sirrini düşmən dövlətə vermişəm? Mən ancaq sülh tərəfdarıyam, müharibə istəmirəm", - B.Səmədov söyləyib. 

Sülh fəalı nənəsinə həm də özünü öldürmək həddinə gəldiyini bildirib. 

B.Səmədovun bir aydan sonra isə Umbakı Penitensiar Kompleksinə köçürüləcəyi bildirilir. 

Ə.Təhməzovun dediyinə görə, cəzaçəkmə müəssisəsinin rəisi fəalın "karser"də saxlanılmasını ümumi kamerada Qarabağ müharibəsi iştirakçısının olması ilə izah edib. Rəis iddia edib ki, B.Səmədov dövlətə xəyanətdə ittiham edildiyinə görə onların arasında münaqişə baş verə bilər. 

"Əvvəla, qazi ilə Bəhruzun nə işi? Bəhruz sülh üçün danışan adamdır. Elə ən çox qazi ilə yola gedəcək. İkincisi də, yola getməyəcək deyirsinizsə, qazini köçürün şəhəriçi başqa "zon"a. Bəhruzun 82 yaşlı nənəsini adicə yaxınlıqdakı Kürdəxanıya [Bakı İstintaq Təcridxanası - red.] aparıb-gətirəndə halı yolda pisləşirdi. Umbakıya isə, ümumiyyətlə, gedə bilmir. Hansısa qazi məhbus bəhanəsilə Bəhruza və onun ahıl yaşada nənəsinə əzab yaşatmayın. Salmısınız zindana, heç olmasa imkan verin evlərinə yaxın yerdə, nənəsinə yaxın olsun", - Ə.Təhməzov "Facebook" səhifəsində qeyd edib. 

Yaxınları xatırladırlar ki, B.Səmədov həbsdə əvvəllər iki dəfə intihara cəhd edib və son anda xilas edilib.

Deyilənlərlə bağlı Penitensiar Xidmət hələ ki münasibət bildirməyib.

Çexiyanın Karlov Universitetinin doktorantı olan Bəhruz Səmədov Dövlət Təhlükəsizliyi Xidmətinin əməkdaşları tərəfindən 2024-cü il avqustun 21-də həbs olunub.

O, 2025-ci il iyunun 23-də Bakı Ağır Cinayətlər Məhkəməsinin hökmü ilə 15 il müddətinə azadlıqdan məhrum edilib. 
Sülh fəalı dövlətə xəyanətdə ittiham olunub.

Cinayət işində iddia olunur ki, o, Ermənistan xüsusi xidmət orqanları ilə əməkdaşlıq edib. 

Bəhruz Səmədov məhkəmələrinin birində vurğulayıb ki, heç vaxt Dağlıq Qarabağın Ermənistan ərazisi olduğunu deməyib və daim sülh tərəfdarı olub. 

O, dövlətlər arasında müharibəyə və bunun nəticəsində insanların ölməsinə qarşı olduğunu bildirib.