Ötən ilin iyununda paytaxtın "Baksol yolu" adlanan ərazisində 27 yaşlı gəncin ölümü ilə nəticələnən yol çöküntüsündə təqsirləndirilən, Bakı Su Kanal İdarəsinin sahə rəisi Azər Cümşüdovun işi üzrə növbəti məhkəmə prosesi keçirilib.

APA-nın xəbərinə görə, fevralın 17-də Nərimanov Rayon Məhkəməsində hakim Gültəkin Əsədovanın sədrliyi ilə keçirilən prosesdə Bakı Şəhər Su Kanal İdarəsinin ərazi üzrə təmir-tikinti şöbəsinin rəisi Yaşar Əhmədov şahid qismində dindirilib. 

Y.Əhmədov ibtidai istintaqa verdiyi ifadəni təkzib edib: "Dediklərimin tam əksi yazılıb. Mən onu oxumadan imzalamışam, təsdiqləmirəm." 

Bu zaman dövlət ittihamçısı şahidə irad bildirib: "Ali təhsilli adamsan, niyə oxumadan imzalamısan?". Şahid isə 3 saat gözləyib yorulduğu üçün ifadəni imzaladığını deyib. 

Y.Əhmədov məhkəmədə ifadəsində bildirib ki, təqsirləndirilən Azər Cümşüdovu çöküntü olan əraziyə özü göndərib. 

"Bizə ərazidə çöküntü ilə bağlı məlumat daxil oldu. Azərin komandasını göndərdim ki, vəziyyətə baxsınlar. Baxıb mənə protokolu göndərdilər. Daha sonra ərazini təhlükəsizlik işarələri ilə bağlayıb mənə şəkillərini göndərdilər. Hüquqşünasımız orada yerləşən mağazalara da xəbərdarlıq etdi. Həmin işarələrə nəzarət Azər Cümşüdovun işi deyildi. İstəsə də, edə bilməzdi. İdarə rəsinin müavini şahid qismində gələcək, ora nəzarətlə bağlı sualları o cavablandıra bilər", - o qeyd edib. 

Dövlət ittihamçısının suallarını cavablandıran şahid bildirib ki, hadisədə günahkar Azər Cümşüdov deyil: "O gənc gəlib oraya düşüb, bu, qismətdir. Heç kim bunu təxmin edə bilməzdi. Bu, başqası da ola bilərdi. O ki, qaldı "günahkar kimdir" sualına, günahkar o işarələri oradan götürənlərdir”.

Zərərçəkənin vəkili şahiddən həmin ərazidə niyə təmir aparılmadığını soruşub. Şahid cavab verib ki, təmir üçün lazım olan material 1 ay gec ayrılıb, material olmadığı üçün də təmir apara bilməyiblər.

Növbəti proses martın 3-nə təyin edilib.

Ötən il iyun ayında "Baksol yolu" ərazisində yolun çökməsi nəticəsində kanalizasiyaya düşən Cümşüd Cümşüdlünün meyiti iyunun 28-də Hövsan qəsəbəsində kollektorda tapılmışdı.

İş üzrə təqsirləndirilən şəxs kimi həbs olunan Azər Cümşüdov ötən prosesdə özünü təqsirli bilmədiyini demişdi.