Hazırda həbsdə olan ictimai-siyasi fəal Bəxtiyar Hacıyev ictimaiyyətə müraciət ünvanlayıb.

Müraciəti oktyabrın 30-da “Azadlıq Qəzeti“ dərc edib.

Müraciətində o, korrupsiya və haqsızlıqlara qarşı çıxış etdiyinə görə təzyiqlərə məruz qaldığını bildirib:

“2004-cü ildə təhsil sistemində korrupsiyaya etiraz etdim, 2007-ci ildə isə kommunal qiymətlərin artımına qarşı sayt yaratdım və 12 sutka inzibati həbsə məruz qaldım. Həmin il Harvard Universitetinə qəbul olunsam da, dövlət rəsmiləri təqaüddən imtina etməyimi tələb etdilər, mənə isə dövlət proqramı çərçivəsində maliyyə dəstəyi verilmədi.”

Hacıyev deyib ki, illərdir dövlət strukturlarında ona qarşı aparılan kampaniyanın arxasında sabiq Prezident Aadministrasiyası rəhbəri Ramiz Mehdiyev dayanıb:

“2010-cu ildə deputatlığa namizəd oldum, faktiki qalib gəldiyim seçkidən dərhal sonra həbs edildim. Bütün bunlar və 2019-cu ilə qədər qarşılaşdığım polis təzyiqləri, həbslər və məhrumiyyətlər birbaşa Ramiz Mehdiyevin əmri ilə həyata keçirilirdi. Hər zaman o və ətrafındaki yaşlı və gənc əlaltıları məni inqilabçı, dövlət çevirilişinə hazırlaşan şəxs kimi tədqim edirdilər. Son həbsim zamanı da cinayət işində müxtəlif formalarda guya mənim dövlət çevirilişinə hazırlaşmağım barədə qeydlər var.

Bu gün isə mənə bu ittihamları illərdir yapışdırmağa çalışan Ramiz Mehdiyevin özü dövlət çevrilişinə hazırlıqda ittiham edilir, mühakimə olunur”

Bəxtiyar Hacıyev öz fəaliyyətinin heç vaxt dövlət maraqlarına zidd olmadığını vurğulayıb.

“Mənə qarşı irəli sürülən ittihamlar saxtadır. Heç vaxt ölkənin maraqlarına zərbə vuran heç bir addım atmamışam. Mənim fəaliyyətim demokratik cəmiyyətlərdə vətəndaş cəmiyyəti işidir, cinayət deyil.”
Siyasi fəal bildirib ki, bu gün də Ramiz Mehdiyevin keçmiş təsir dairəsində qalan şəxslər “vətəndaş cəmiyyəti nümayəndələrinin, jurnalistlərin və hüquq müdafiəçilərinin həbsdə saxlanması üçün hər vasitəyə əl atırlar”, - deyə Hacıyev bildirib.

Onun fikrincə, belə davranışlar Azərbaycanın inkişaf etmiş Qərb ölkələri ilə strateji tərəfdaşlığına zərbə vurur, cəmiyyətdə narazılıq və aqressiya yaradır.

Oktyabrın 14-də hökumətyönlü media Səbail Rayon Məhkəməsinin Prezident Administrasiyasının keçmiş rəhbəri, Azərbaycan Milli Elmlər Akademiyasının sabiq prezidenti Ramiz Mehdiyev barəsində 4 aylıq ev dustaqlığı qətimkan tədbiri seçdiyi xəbərini yayıb. 

Mehdiyevin Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma) maddələri ilə ittiham olunduğu bildirilir. 

Hacıyev müraciətini 44 günlük Vətən müharibəsinin 5 illiyi ərəfəsində “ictimai barışığın təşviqi” çağırışı ilə tamamlayıb:

“Ümid edirəm ki, hələ də sağlam düşünən dövlət adamları var və onlar zəfər bayramı ərəfəsində siyasi sifarişlə həbs edilmiş vətəndaş cəmiyyəti təmsilçilərinin, jurnalistlərin və digər məhkumların azadlığa buraxılması istiqamətində təşəbbüs göstərəcəklər.”

Bəxtiyar Hacıyev yanvarın 13-də Bakı Ağır Cinayətlər Məhkəməsinin hökmü ilə 10 il azadlıqdan məhrum edilib. Bundan başqa, ictimai fəalın evi və bank hesablarındakı pul müsadirə olunub. 

Ona təlim-tədris işləri qadağan edilib.

İctimai fəal özünü təqsirli bilmədiyini, sifarişlə həbs olunduğunu bildirib.