Qarabağda yaşamış, bu yaxınlarda Ermənistana köçürülən erməni sakinlərin Azərbaycandan zorla çıxarıldığı haqda məlumat yayılıb. 

Bunu "Azadlıq Radiosu"nun erməni xidmətinə əslən Qarabağdan olan jurnalist Tiqran Petrosyan deyib. 

O, sakinlərdən birinə istinadən iddia edib ki, 10 erməni və bir rus sakin avtobusa doldurularaq Azərbaycan-Ermənistan sərhədindəki Həkəri keçid məntəqəsinə gətirilib. 

"Onlar öldürülmək üçün gizlin yerə aparıldıqlarını düşünüblər. Qadınlardan biri yolboyu ağlayıb. Yalnız sərhədə çatanda Ermənistana təhvil veriləcəklərini başa düşüblər", - o qeyd edib. 

Petrosyanın sözlərinə görə, sakinlərdən biri, Azərbaycan mediasına müsahibələri ilə məşhurlaşmış Mişa Qriqoryan sərhəddən geri qayıdıb. 

“O deyib ki, 'mən getmirəm, məni ermənilər öldürəcəklər' və s. Qorxurmuş ki, burada onu öldürəcəklər, türklərin [azərbaycanlılar - red.] ayaqları altına düşüb. Türklər də deyiblər ki, 'əgər qalsan, səni burada biz öldürəcəyik'. O isə deyib ki, 'yaxşısı budur, siz məni öldürün'. Ağlayıb-sızlayıb, sonra onu yenidən maşına mindirib aparıblar”, - Petrosyan deyib. 

M.Qriqoryan Bakıda həbsdə olan erməni iş adamı Ruben Vardanyanın məhkəməsində onun əleyhinə ifadə verməsi ilə də tanınıb. O, Azərbaycan mediasına müsahibələrində Azərbaycan hakimiyyətini tərifləyib, Qarabağdakı keçmiş separatçı rejimi isə tənqid edib. 

Petrosyanın sözlərinə görə, Qarabağdan köçürülmüş sakinlər ahıl və psixi sağlamlıq problemləri olan şəxslər olub və onlar son aylarda Xankəndidə hoteldə, təcrid olunmuş vəziyyətdə saxlanılıblar. O iddia edib ki, sakinlərə son vaxtlar Ermənistana getmələri üçün psixoloji təzyiqlər edilib. 

Azərbaycan və Ermənistanın rəsmi qurumları iddiaya münasibət bildirməyib. 

Yanvarın 23-də Ermənistanın əmək və sosial əlaqələr naziri Arsen Torosyan Qarabağda yaşayan 10 erməni və bir rusun Ermənistana təhvil verildiklərini bildirib. 

“Onlar Azərbaycan və Ermənistanın müvafiq qurumlarına Ermənistan Respublikasına köçürülmə ilə bağlı müraciət etmişdilər. Müraciətlər əsasında qeyd olunan şəxslər Ermənistan Respublikasına köçürülüb,” - nazir bildirib. 

Azərbaycan 2023-cü ilin sentyabrında keçmiş Dağlıq Qarabağ ərazisində hərbi əməliyyat keçirməklə bölgəyə nəzarəti bərpa edib. Nəticədə bölgəyə həmin vaxta qədər nəzarət edən separatçı qurum ləğv edilib və orada yaşayan yüz minə yaxın erməni mülki əhali Ermənistana köçüb. 

Rəsmi məlumatlarda bildirilirdi ki, ərazidə 20-yə yaxın, əsasən ahıllıq vəziyyətinə görə səfər edə bilməyən mülki ermənilər qalıb. 

Azərbaycan həm də bu yaxınlarda həbsdə olan 4 ermənini Ermənistana təhvil verib.