Həbsdə olan iqtisadçı Fazil Qasımov baş prokuror Kamran Əliyevə müraciət edib. 

Ailəsinin "Toplum TV" ilə paylaşdığı, 20 dekabr tarixli müraciətdə iqtisadçı bu ilin martında 9 il azadlıqdan məhrum edildiyini, apellyasiya şikayətinin təmin olunmadığını xatırladıb. 

"Bununla belə, müstəntiq Yusif Yusifov tərəfindən istintaq sənədlərində yol verilmiş səhvlər və iş üzrə təqsirləndirilən şəxs qismində dindirilmiş Əliyev Anar Şahismayıl oğlunun istintaqa verdiyi məlumatların yalan olduğunu göstərən dəlillər mənə elan edilmiş ittihamların əsassızlığını tam şəkildə sübut edir", - o əlavə edib. 

F.Qasımov bildirib ki, həbs edilənə qədər İstanbul Universitetində doktorant olub və həbsi elmi fəaliyyətinə məcburi ara verməsinə səbəb olub. 

"Müstəntiqin sübutları saxtalaşdırılması ilə bağlı faktları da tədqiqat bacarıqlarım sayəsində aşkara çıxarmışam. 28 aydır davam edən qanunsuz həbsim sağlamlığıma zərər verməklə birlikdə, elmi fəaliyyətimin yarımçıq qalmasına səbəb olub", - o vurğulayıb. 

İqtisadçı qanunvericiliyə istinadən qeyd edib ki, dövlət ittihamçısı qismində prokurorun funksiyası yalnız ittihamın müdafiəsi ilə məhdudlaşmır. 

"Prokuror, həmçinin, təqsirləndirilən şəxsin kifayət qədər sübut olmadan təqsirləndirilərək cəzalandırılmasının qarşısının alınması ilə bağlı səlahiyyətə malikdir", - o əlavə edib. 

F.Qasımov K.Əliyevə xatırladıb ki, onun qanunvericiliyə əsasən Apellyasiya Məhkəməsində iştirak etmiş dövlət ittihamçısının əvəzinə instansiya protesti vermək hüququ var. Buna görə də, o, baş prokurordan protest verərək barəsindəki cinayət təqibindən imtina etməyi xahiş edib. 

İqtisadçı Qubad İbadoğlunun işi ilə bağlı 2023-cü ildə Türkiyədə saxlanılaraq Azərbaycana gətirilən Fazil Qasımov bu ilin martında 9 il müddətinə azadlıqdan məhrum edilib. 

O, Cinayət Məcəlləsinin satış məqsədilə hazırlama, o cümlədən saxta pul və ya xarici valyuta əldə etmə və ya satma - eyni əməllər mütəşəkkil dəstə tərəfindən törədildikdə maddəsilə ittiham olunub.

Özü isə ittihamı rədd edir. 

Qubad İbadoğlu 2023-cü ilin iyulunda həbs olunub, satış məqsədi ilə hazırlama, o cümlədən saxta pul və ya xarici valyuta əldə etmə və ya satma və dini ekstremist materialları hazırlama, saxlama və ya yayma maddələri ilə ittiham olunur. O da ittihamları rədd edir. 

Ötən ilin aprelində Q.İbadoğlu ev dustaqlığına buraxılıb, mayda isə bu qətimkan tədbiri də dəyişdirilib və o, polis nəzarətinə verilib.