Demokratik Qüvvələrin Milli Şurasının üzvü, sabiq deputat Gültəkin Hacıbəyli hökumətyönlü mediada haqqında gedən iddialara cavab verib. 

Oktyabrın 29-da "Teleqraf.az" saytı Prezident Administrasiyasının sabiq rəhbəri, haqqında cinayət işi açıldığı bildirilən Ramiz Mehdiyevin yaratmaq istədiyi iddia edilən "Dövlət Şurası" üzvləri siyahısında G.Hacıbəylinin adının yer aldığı xəbərini yayıb. 

Oktyabrın 30-da isə "Oxu24.az" saytı sabiq deputatın ölkəni tərk etdiyi iddiasını tirajlayıb. 

"Toplum TV"-yə danışan G.Hacıbəyli bildirib ki, sentyabrın 25-dən oğlunun təhsili ilə əlaqədar Türkiyədədir, lakin yaxın zamanda Azərbaycana qayıdacaq. 

O, haqqında xəbərlər yayan saytların vaxtilə məhz R.Mehdiyev tərəfindən yaradıldığını deyib. 

"Bu ölkədə hər kəs bilir ki, R.Mehdiyev o "Teleqraf" agentliyini məhz Aynur Camalqızı üçün yaradıb və Kəmaləddin Heydərova tapşırıb ki, maliyyələşdirsin. R.Mehdiyevin mənə qarşı bütün çirkli kampaniyasını A.Camalqızı aparıb. 2013-cü ildə R.Mehdiyev insanları mənə qarşı qoyanda, məhkəmələrə verəndə bütün bunları A.Camalqızının saytları yayımlayırdı. Mən bu işlərlə bağlı Avropa Məhkəməsinə şikayət edəndə, ərizəmdə məhz A.Camalqızının saytlarına istinad edirdim, çünki bütün təhqirlər, aşağılayıcı ifadələr ən geniş şəkildə məhz orada gedirdi. İndi də R.Mehdiyevə xidmət etmiş adamların canına qorxu düşüb, məsuliyyətə cəlb olunacaqlarını bilirlər və buna görə öz xidmətlərini qabartmaq və hakimiyyət qarşısında özlərini təmizə çıxarmaq istəyirlər. Bütün bunlar özlərini sığortalamaq cəhdindən başqa bir şey deyil", - G.Hacıbəyli bildirib. 

Hacıbəyli əlavə edib ki, onu R.Mehdiyevə "bağlamaq üçün insan gərək şüurunu itirsin". 

"Çünki R.Mehdiyev mənə qarşı elədiklərini bəlkə başqa heç kimə qarşı eləməyib. O, məni şəxsi düşməni olaraq müəyyən edib və mənə qarşı illərlə etdikləri göz önündədir. Mən Goranboyda millət vəkili olanda rayonun icra başçısı Nizaməddin Quliyevə mənə qarşı kampaniya aparmaq üçün tapşırıqlar verib, 9 yaşlı oğlumu əlimdən almaq üçün hədə-qorxu gəlib, illərlə məhkəmələrə gedib-gəlmişəm. Məhkəmədə üzümə duran adamı prokurorluqda vəzifəyə təyin ediblər. Bütün bunların arxasında R.Mehdiyev durmuşdu və bu təbliğatı da "Publika.az", "Teleqraf.az" saytları aparırdı", - o qeyd edib. 

G.Hacıbəyli xaricə getdiyi iddialarına cavab olaraq həm də deyib ki, o, "vətənində həbsxanada olmağı xaricə getməkdən üstün tutur". 

R.Mehdiyevlə hər hansı əlaqəsi iddialarına qarşı isə o bildirib ki, o, sabiq PA rəhbərini sonuncu dəfə 2009-cu ildə görüb. 

"Amma o vaxtdan bəri Aynur Camalqızı R.Mehdiyevin verdiyi imkanlar hesabına ölkənin ən zəngin insanlarından birinə çevrilib. Milyonlar qazanıb, özünə villalar, mülklər tikdirib. İndi R.Mehdiyevin adamı o olur, yoxsa 16 ildir R.Mehdiyev tərəfindən amansız təqiblərə məruz qalan mən?", - deyə G.Hacıbəyli sual edib. 

Qeyd: “Toplum TV” Gültəkin Hacıbəylinin iddiaları ilə bağlı Aynur Camalqızının cavabını dərc etməyə hazırdır.

Oktyabrın 14-də hökumətyönlü media Səbail Rayon Məhkəməsinin Prezident Administrasiyasının keçmiş rəhbəri, Azərbaycan Milli Elmlər Akademiyasının sabiq prezidenti Ramiz Mehdiyev barəsində 4 aylıq ev dustaqlığı qətimkan tədbiri seçdiyi xəbərini yayıb. 

Mehdiyevin Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma) maddələri ilə ittiham olunduğu bildirilir. 

Daha sonra isə media R.Mehdiyevin Azərbaycanda dövlət çevrilişi planı ilə bağlı Rusiyaya məktub ünvanlandığını və 50 nəfərdən ibarət "Dövlət Şurası" yaratmaq istədiyi xəbərini yayımlayıb. 

Rəsmi qurumlar bu xəbərləri nə təsdiqləyib, nə də inkar edib.