Yanvarın 26-na olan məlumata görə, İranda təsdiqlənmiş ölənlərin sayı 6 min 126 nəfərə çatıb. Bu barədə ABŞ-də yerləşən HRANA insan haqları təşkilatı məlumat yayıb. 

Bildirlir ki, ölənlərdən 5 min 777-si etirazçı, 214-ü hökumətə bağlı qüvvələrin üzvləri, 49-u isə etirazlarda iştirak etməyən şəxslər və ya mülki vətəndaşlardır. Təşkilat bildirir ki, daha 17 min 91 ölüm halı hələ də araşdırılır.

ABŞ prezidenti Donald Tramp yanvarın 26-da “Axios”a müsahibəsində İranla bağlı vəziyyətin “dəyişkən” olduğunu deyib. O, bölgəyə “böyük donanma” göndərildiyini təsdiqləsə də, Tehranın həqiqətən razılaşma əldə etmək istədiyini düşündüyünü bildirib.

Yanvarın 27-nə olan məlumata görə, İranda internet artıq 19 gündür ki, kəsilib. Hakimiyyət bu addımı dekabrın 28-də Tehranın bazarlarında iqtisadi vəziyyətə qarşı başlayan və sonradan ölkə üzrə yayılan kütləvi etirazlardan sonra atıb. 

İranda internet və telekommunikasiyanın bloklanmasının ölkə iqtisadiyyatına gündə təxminən 50 trilyon rial (35,7 milyon dollar) zərər vurduğu deyilir.

Bunu yanvarın 26-da rabitə naziri Səttar Haşimi açıqlayıb. Onun sözlərinə görə, hesablamalar internet şirkətləri və bizneslərin orta dözümlülük müddətinin təxminən 20 gün olduğunu göstərir və ölkə artıq bu həddə yaxınlaşır.

Bir çox biznes sahibləri sosial mediada internet blokadasının yaratdığı ciddi çətinliklərdən danışır. Onların bir qismi bizneslərinin məhv olduğunu, digərləri isə müflislik üçün müraciət etdiklərini bildirir.

Son üç həftədə İranın apardığı siyasət həm insanların gəlir əldə etmək imkanlarını məhdudlaşdırıb, həm də əsas istehlak mallarının qiymətlərinin artmasına səbəb olub.

Eyni zamanda, Birləşmiş Ərəb Əmirlikləri İrana qarşı hər hansı hərbi əməliyyat zamanı öz hava məkanı, ərazisi və ya sularından istifadəyə icazə verməyəcəyini bəyan edib.

Bundan əvvəl Vaşinqton İranda həftələrlə davam edən iğtişaşlardan sonra “hər ehtimala qarşı” Yaxın Şərqə böyük donanma göndərdiyini bildirmişdi. Donald Tramp hərbi müdaxilə ehtimalını istisna etmədiyini demişdi.