İsrail və HƏMAS Qəzzada atəşkəsə və əsir mübadiləsinə razılaşıblar. 

Bu barədə ABŞ Prezidenti Donald Tramp "Truth Social" şəbəkəsində xəbər verib. 

"Mən böyük qürur hissi ilə elan edirəm ki, İsrail və HƏMAS Sülh Planımızın birinci mərhələsini imzalayıb. Bu o deməkdir ki, bütün girovlar çox tezliklə azad ediləcək və İsrail qoşunlarını razılaşdırılmış xəttə qədər geri çəkəcək — bu, Güclü, Davamlı və Əbədi Sülhə doğru ilk addımdır. Bütün tərəflərə ədalətli yanaşılacaq! Bu, ərəb və müsəlman dünyası, İsrail, bütün qonşu ölkələr və Amerika Birləşmiş Ştatları üçün möhtəşəm bir gündür. Bu tarixi və misilsiz Hadisənin baş tutmasına yardım edən Qətər, Misir və Türkiyə nümayəndələrinə təşəkkürümüzü bildiririk", - o yazıb. 

İsrail baş naziri Benyamin Netanyahu da "X" səhifəsində xəbəri təsdiqləyib. O, razılaşmanı İsrailin "diplomatik uğuru və milli və əxlaqi qələbəsi" adlandırıb. 

HƏMAS isə açıqlama yayaraq bildirib ki, razılaşma “Qəzzaya qarşı müharibənin dayandırılmasını, işğalçı qüvvələrin Qəzzadan çıxarılmasını, humanitar yardımın daxil olmasını və məhbus mübadiləsini” nəzərdə tutur.

Qruplaşma Qətər, Misir, Türkiyə və Trampa vasitəçilik səylərinə görə təşəkkür edib. Hərəkat, həmçinin, Trampı və digər tərəfləri “işğalçı hökuməti razılaşmanın tələblərini tam şəkildə yerinə yetirməyə məcbur etməyə və onun razılaşdırılmış müddəaları yerinə yetirməkdən yayınmasına və ya təxirə salmasına imkan verməməyə” çağırıb.

Açıqlamada deyilir:
“Biz Qəzza Zolağında, Qüdsdə və İordan çayının qərb sahilində yaşayan böyük xalqımıza salam göndəririk – onlar misilsiz qürur, qəhrəmanlıq və şərəf nümayiş etdirdilər. Bu böyük fədakarlıqlar və möhkəm mövqelər İsrail işğalının tabe etdirmə və köçürmə planını puça çıxardı.”

HƏMAS bəyanatında əlavə edib ki, “xalqımızın azadlıq, müstəqillik və öz müqəddəratını təyinetmə kimi milli hüquqlarından imtina etməyəcək.”

HƏMAS rəsmisi "Al Jazeera"-yə əsirlərin 72 saat ərzində azad oluna biləcəyini deyib. 

Qəzza sakinləri oktyabrın 9-a keçən gecə bombardmanın dayandığını xəbər veriblər. 

Netanyahu bildirib ki, o, razılaşmanı oktyabrın 9-da hökumət kabinetinə təsdiq üçün təqdim edəcək.
Razılaşma qəbul olunduqdan sonra İsrail ordusu Qəzzadan geri çəkiləcək, bundan 72 saat sonra isə HƏMAS-ın girovların azad edilməsinə başlaması gözlənilir.

Trampın isə yaxın günlərdə Misirə səfər edəcəyi gözlənilir. Netanyahu da onu İsrail parlamentində (Knessetdə) çıxış etməyə dəvət edib və Tramp mətbuata verdiyi açıqlamada bu səfəri həyata keçirmək və çıxış etmək ehtimalının “böyük olduğunu” bildirib.

2023-cü ilin oktyabrında HƏMAS-ın İsrailin cənubuna etdiyi hücumla başlayan müharibə düz iki il İsrailin Qəzzanı bombalaması ilə davam edib. 

Bu müddət ərzində Qəzzada 66 mindən çox sakinin öldüyü bildirilir. Onların 20 mindən çoxu uşaqlardır. 

HƏMAS 2023-cü ilin oktyabrında 250-ə yaxın israillini əsir götürüb. Onların 20-sinin hələ də əsirlikdə olduğu güman edilir.