Həbsdə olan müxalif siyasətçi Tofiq Yaqublu sentyabrın 26-da Penitensiar Xidmətin Müalicə Müəssisəsində vəkil Nemət Kərimli ilə görüşüb. 

Bu barədə "Facebook" səhifəsində xəbər verən qızı Nigar Həzi qeyd edib ki, Tofiq Yaqublunun səhhətində çox ciddi problemləri var, ancaq müalicə müəssisəsində olmasına baxmayaraq onun müayinə və müalicəsi aparılmır. 

O bildirib ki, vaxtında müayinə və müalicə olunmazsa, onun səhhətindəki problem geridönməz hala çevriləcək. 

“Əminəm ki, Tofiq Yaqublunun səhhətiylə bağlı məsələlər yuxarılarda müzakirə olunur və qərar qəbul olunur. Bu cür davranış isə onu deməyə əsas verir ki, müayinə və müalicənin aparılmaması məqsədlidir və qərəzlidir. 

İlham Əliyevin Tofiq Yaqubluya nifrəti, qəzəbi və qisası ölkədə heç kimə sirr deyil. Tofiq Yaqubluya qarşı belə münasibətin tapşırığı da məhz Prezident Administrasiyasından gəlir. Putin Navalnımı necə rahatlıqla öldürdüsə, eynisi də İlham Əliyev edə bilər.
Tofiq Yaqublunun həyatına görə məsuliyyəti birbaşa İlham Əliyev daşıyır”, - Nigar Həzi vurğulayıb.

Milli Şura və Müsavat Partiyasının üzvü olan Tofiq Yaqublu bu il martın 10-da Bakı Ağır Cinayətlər Məhkəməsinin hökmü ilə 9 il azadlıqdan məhrum edilib. 

O, Cinayət Məcəlləsinin külli miqdarda ziyan vurmaqla dələduzluq və saxta sənəd hazırlama və ya istifadə etmə maddələri ilə təqsirli bilinib. 

Özü isə ittihamları qurama sayır. 

T.Yaqublu hökmə etiraz olaraq aprelin 1-dən mayın 10-a qədər aclıq edib. 

O, 2013-cü ildə də İsmayıllıda etirazlarda iştirak etdiyinə görə Cinayət Məcəlləsinin 233-cü (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) və 315-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddələrilə həbs edilib. Şəki Ağır Cinayətlər Məhkəməsinin qərarı ilə 5 il müddətinə azadlıqdan məhrum edilib.
Beynəlxalq ictimaiyyət, ABŞ və Avropa İttifaqı tərəfindən həbsi pislənilib. 2016-cı ilin martında əfv sərəncamı ilə azadlığa buraxılıb.