Azərbaycan prezidenti İlham Əliyev ötən ay Milli Elmlər Akademiyasında çıxışında xarici ölkələrdə yaşayan azərbaycanlıların ana dili məsələsinə də toxundu. Ölkə başçısı azərbaycanlılar arasında ana dilinin “itirilməsindən” narahatlığını ifadə etdi. 

“Bu gün 50 milyondan çox insan üçün Azərbaycan dili ana dilidir. Ancaq təmiz, saf, ədəbi Azərbaycan dilinin qoruyucuları bizik - müstəqil Azərbaycan dövləti. Mən azərbaycanlıların yaşadıqları müxtəlif bölgələrdə vəziyyətlə müntəzəm surətdə tanış oluram, diqqətdə saxlayıram, lazımi tədbirlər görürəm. Görürəm ki, bəzi yerlərdə bizim ədəbi dilimiz digər ölkələrdə yaşayan azərbaycanlılar arasında itirilir. Daha çox məişət dili kimi istifadə olunur, xarici kəlmələrlə dolu olur. Ona görə biz öz dilimizi qorumasaq, dilimizi təmiz, saf saxlamasaq, onda yavaş-yavaş dilimizi itirə bilərik”, - o qeyd edib. 

Bu günlərdə Gürcüstana səfər edən elm və təhsil naziri Emin Əmrullayev də mövzunu gündəmə gətirib. O, “Azərtac”a müsahibəsində deyib ki, bu ölkədə yaşayan azərbaycanlıların ana dilində ali təhsil almaq imkanları “məhdud olmamalıdır”, lakin o, bunun üçün onlara Azərbaycanda təhsil almağı təklif edib. 

“Soydaşlarımıza bu istiqamətdə istər müəllimlik, istərsə də digər ixtisaslar üzrə xüsusi yanaşma olub. Amma biz istərdik ki, onların içərisində Azərbaycan dilinə maraq göstərən daha çox olsun. Çünki Azərbaycan dili müəllimi hazırlığını yalnız ölkəmizdə keyfiyyətli etmək daha asandır. Təbii ki, Azərbaycan dilinin tədrisi ilə bağlı daha çox iş görə bilərik. Bu istiqamətdə işlərimiz yəqin ki, daha intensiv olacaq”, - o bildirib. 

Gürcüstan azərbaycanlısı, ictimai fəal Samirə Bayramova “Toplum TV”-yə deyib ki, 2019-cu ildə bu ölkədə etnik azlıqların ana dilində təhsili məsələsini gündəmə gətirmək üçün özü də daxil olmaqla azərbaycanlı və erməni azlıqların nümayəndələrindən ibarət işçi qrup yaradılıb. 

Onun sözlərinə görə, işçi qrup ölkədə Azərbaycan dilli və erməni dilli məktəblərin olduğunu əsas gətirərək həmin məktəblərdə ana dili fənnini tədris edəcək müəllimlərin məhz Gürcüstanda hazırlanması, buna görə də bu ölkənin dövlət universitetlərində Azərbaycan dili və erməni dili fakültələrinin yaradılması məsələsini qaldırıb. 

Bu barədə hesabat aiddiyatı qurumlara və beynəlxalq təşkilatlara, habelə Azərbaycan və Ermənistanın Gürcüstandakı səfirliklərinə göndərilib. 

“Bununla bağlı mən İlia Dövlət Universitetinə, Texniki Universitetə və başqa ali təhsil müəssisələrinə müraciət etdim. Onlar müsbət cavab verdilər. Hətta İlia Universitetində 2010-cu ilə qədər Azərbaycan dili fakültəsi olub, lakin fakültənin rəhbər şəxsləri vəfat edəndən sonra davam etdirməyiblər. Müəssisələr bildirdilər ki, bu prosesi başlatmağa hazırdırlar, lakin təbii ki, kadr problemi mövcuddur və bunun üçün Azərbaycan və Ermənistanın dəstəyi lazımdır”, - o xatırlayıb. 

S.Bayramova qeyd edir ki, həmin vaxt universitetlərin cavab məktubları ilə birlikdə Azərbaycan səfirliyinə müraciət edib və səfirlikdən də ona prosesə dəstək olunacağı barədə söz verilib. O, 2023-cü ildə Gürcüstana səfər edən elm və təhsil naziri E.Əmrullayevlə də görüşüb və problemi onun diqqətinə çatdırıb. 

Fəal bildirir ki, artıq təşəbbüsün üstündən bir neçə il keçsə də, Gürcüstanda Azərbaycan dili fakültələrinin açılması üçün Azərbaycan tərəfindən heç bir addım atılmayıb. 

“Bu, bir ictimai fəal olaraq mənim idarə edə biləcəyim proses deyildi, mən sadəcə təşəbbüs göstərdim. Amma hər iki ölkə məsələnin həll olunacağı barədə üzərinə məsuliyyət götürdü və deyildi ki, vacib məsələdir, iş görüləcək və s. Üzərindən neçə il keçib, ortada heç nə yoxdur. İndi Azərbaycanın təhsil naziri yenə gəlib, ordan-burdan danışıb, amma yenilik yoxdur”, - o deyib. 

S.Bayramova düşünür ki, Azərbaycan hakimiyyəti Gürcüstan azərbaycanlılarının Azərbaycanda ali təhsil almasında və qayıdıb Gürcüstan məktəblərində Azərbaycanın “daxili və xarici maraqlarını təbliğ etmələrində” maraqlıdır. 

“Axı biz Gürcüstana inteqrasiyadan danışırıq. Bu isə inteqrasiyaya tamamilə zidd bir məsələdir. Azərbaycanda təhsil alan pedaqoqlar gürcü dilini öyrənə bilmirlər, Gürcüstan məktəblərində tədrisə necə öyrəşəcəklər?”, - o sual edib.